Aha! nagtikang na! — nahakalipay, ngan an lento iginpadayon ngadto ha allegro vivace.
An waray palad nga tuyaw ginmuliat alagad han pagsakiti ngan iginpamumundak an mga tiil.
— Diri ka masayaw nga p... ka nga indiyo? — nasiring an ginang dungan han pagpanlapirit han latigo.
Hi Sisa pinmakapuklid ha salog ngan itabon an iyal duha nga kamot ha iya mga tiil, nanhuhulwa an iya mga mata ha pagkinita han iya berdugo. Duha nga lagatob ha bungkog nakapabuhat ha iya; diri na guliat an ginmawas ha iya baba, kundi duha nga uwang. Nagisian han manipis nga bado, binmuto an panit ngan inmawas in dugo.
An dugo nakakapadugang han kabangis han tigre, an dugo han iya gindadarahugan nakapadugang han kapintas ni Da. Consolacion.
— Sayaw, sayaw, tampalasan nga waray haros! Nga b... ka han imo i . . . !— naguliat an ginang; — sayaw kun diri papatayon ko ikaw!
Ngan gunitan niya han iya usa nga kamot hamtang ginlilinamba han luyo ngan iya igsayaw dida han ruwang.
Sinmabot na ngahaw an tuyaw ngan inmalagad pamalod hin bulag. Usa nga hiyom nga kanan pagtunga inabat ha mga im-im han magturutdo, hiyom nga kanan Mepistopeles nga babayi nga nakaagi hin maupay nga tinutduan; may dara nga kangalas, pakatamay, pagtiaw ngan kapintas, adto nga iya harahara: waray na ikadudugang.
Ngan tungod han paghimalanga han iya binuhat nga kiritaon waray pakabati nga inmabot an iya asawa kun diri dida na han pagharangkaol han iya pagsulod kay binanyakan an sada.
Ginduduas ngan waray tawatawa an alperes; nakakita han nahananabo didto ha sakob han ruwang ngan sinmiplat hin makalilisang nga siplat ngadto han iya asawa. Kundi ini waray kabantad didto han iya himumutangan, nagtinawa la lugod hin badyangas.
Dinun'an han alperes ha sugbong an nagsisinayaw, hin maupay nga kaburut'on, ngan pinaukoy. Dida nakaginhawa an tuyaw ngan naghinayhinay paglingkod ha salog, puros han iya la ngahaw dugo.
Waray pa ha ira may nagyayakan: an alperes naghahangos, makusog an pagginhawa; an babayi nga nagkikinita ha iya, sugad hin iginpapakiana an iya mga mata, pin-
