nan an mga mata ug mga talinga han bisan hino, labot la hin usa nga amo hi P. Salvi. Baga sugad hin waray niya kinadto nga lain kun diri an pagbantay la kan Maria Clara nga nadugang hin kamahusay dida han iya kamasamdong nga haros pakakasidngon nga nakakahatag ha iya hin kahimtang nga makabibihag nga diri man gud mahihimo nga diri say la pagkinitaon. Kundi an mga mata han pransiskano, nga natatago hin maupay dida han iya haglarom nga kalungagan, waray dara nga kanan pagmahal: didto ha iya halarom nga paniplat nababasa in usa nga waray paglaom nga kasubo: amo adto an paniplat ni Cain han, tikang ha hirayo, nagtatan-aw han mga kahimyangan didto ha paraiso nga iginsisinumat ha iya ni iya nanay!
Nag-iikatarapos adto nga bahin han paguwa nga umabot hi Ibarra; tinmikang dayon in mga guruguro: an ngatanan nagkikinita ha iya ngan han padi.
Kundi baga sugad hin waray la hiya hadto aabat kay nakigkatahod hiya kan Maria Clara ngan han mga kasangkayan hini hin sugad han iya kinaiya nga batasan, ngan tinmupad ha iya paglingkod. An nagyakan la amo hi Sinang.
— Nakadto ka pagkita han bulkan?— nagpakiana.
— Waray, sangkay; inmupod ako han Capitan General.
— Kanugon na! Inmupod ha amon an padi ngan nagsinusumaton hin mga kaagi hin nagkahuhulog ha kalayo, maaram ka? Ginhihinadlok kami basi diri kami makag panliawliaw, maupay ba ito?
An padi binmuhat ngan pumaharani kan D. Filipo ngan baga makigbalingkot. Makusog an pamulong han padi, an kan D. Filipo hinayhinay ngan gutiay la nga tingog.
— Ikinabibido ko an diri pakatuman han inuungara ni V. R., —nagsiring; —hi Sr. Ibarra usa han mga dagko in amot salit may katadungan hin pagtampo dinhi hamtang diri magsamok han hiringyon.
— Kay diri ito pagsamok han hiringyon iton pakaburaw dinhi hinin mag-upay nga mga binunyagan? Usa ini nga pagpasulod hin lobo ha sakob han hinuhugpuan han mga karnero! Baratunon mo ini ha atubangan sa Dios ug ha mga punuan!
— Padre, waray ko pa talikdi an mga buhat ko nga gumikan ha akon kaburut'on, —binmaton hi D. Filipo ngan kinmaob hin gutiay ha padi;—kundi an gutiay ko nga kaladnganan diri natugot nga umirog ako dida han nahatu-
