maghatag hin ubos nga katalahuran.
— Ano imo?— ginpakianhan ni Ibarra.
— Senyor, asya ako hi Lucas nga bugto han namatay kakulop.
— Aw! Ta, bunyog ako han imo mga kasakit... ngan, ano man?
— Karuyag ko, senyor, hibaruan kun pipira an imo igbabayad han mga sakop han panimalay han akon bugto?
— Igbabayad?— nakapakiana an batan'on, waray pakailob hin usa nga kangaralson; —maghihimangraw na la kita mahatungod hito. Balik niyan nga kulop kay may ada ko yana gindadagmitan.
— Pagsumat na gad la kun pipira imo igbabayad! nagpirit hi Lucas.
— Nagsiring na ako ha imo nga maghihimangraw na la kita ha lain nga adlaw, waray ko panahon yana! nagsiring hi Ibarra, nauuyam na.
— Waray ka ito nga uras panahon, senyor?- an mapait nga pakiana ni Lucas nga baga tinmapo kan Ibarra; — waray ka panahon hin panimangno han nagkakamamatay?
— Balik, sangkay, niyan nga kulop! —nagsiring hi Ibarra, inilob an iya kangaralson; —may ada ko ito nga uras linalaoy nga masakit.
— Aha! ngan tungod hin usa nga masakit hikakalimtan mo an mga patay? Nakakasiring ka nga bakay kami kay kablas?...
Siniplatan ni Ibarra ngan inutod an pamulong.
— Ayaw ako pagpirita hin kamaraot(1) —nagsiring ngan magpadayon han lakat. Ginkinita na la hiya ni Lucas nga ha bayhon may ada tawa nga puno hin pagdumot.
— Apo ka gad man gud han nagbulad han akon amay!— nagmugo, nagliligot; —amo pa iton imo dugo!
Ngan balhinon an tingog, magsiring:
— Kundi, magbayad ka ngani hin maupay... sangkay!
Liwas na; an taghimungto nakapanginano, sugad han nahinanabo ha tuig-tuig ngatanan, nga an ira mga hipusan hin kuwarta waray na sulod, nga namagguol hira ngan namagbalhas ug namag-inagma hin waray kasadangan, ngan
