waray nira ginpahimulusan, waray bag-o nga iginkasangkay, ha usa kapulong, ginpalit nira hin mahal an aringasa ug kamalipong ha ulo. Kundi, waray sapayan; ha sunod nga tuig bubuhaton la gihapon ito sugad man ha masunod nga mga panahon, kay ini amo an batasan tikang pa hadton una ngada yana.
Ha balay ni Kapitan Tiyago dako an kasakit nga naguop; tinakpan ngatanan an mga tangbuanan, an mga tawo hinay an pagpitad ngan didto la ha kusina an naghihiruhimangraw hin dagko. Hi Maria Clara, an kinabuhi ha panimalay, masakit, nahuhulid ha higdaan; an iya kamutangan nababasa ha ngatanan nga bumabalay, sugad nga na babasa ha bayhon han tawo an kasakitan ha iya kalag.
— Ano an ha imo, Isabel? Malimos ako didto ha Krust ha Tunasan, kun didto ba ha Krus ha Matahong? — nahuring an mabiduon nga amay. -An Krus ha Tunasan natubo, kundi an ha Matahong iginbabalhas; hain hito, an baga ha imo, an labi kamilagruso?
Hi Dada Isabel namurubuot, pinmiling ngan magsiring:
— Pagtubo... an pagtubo darudako nga katingalahan han pagbalhas; ngatanan iginbabalhas, kundi diri kita ngatanan natubo.
— Oo, matuod ito, Isabel, kundi hunahunaa nga an balhas... nga kun iginbabalhas an kahoy, nga ituruko hin bangko diri harumamay la nga pangasa . . . An akon la, gabay limusan ito nga duha nga krus basi waray umuba ngan mag-upay hin dagmit hi Maria Clara... Inaydan an mga sulod? Sayod ka nga upod hadin mga doktores in usa nga batan'on nga dapit urupod ni P. Damaso; kaangayan nga waray gud makulang.
Didto ha luyo nga katapusan han komedor nanlilingkod an duduha nga magpatod, hira Sinang ngan hi Victoria, nga nagpakada pagbulig pagmangno han masakit. Binubuligan hira ni Andeng panhinis hin mga garamiton nga de plata ha pag-inom hin siminte.
— Nakilala kamo kan Doktor Espadana? —nagpipinakiana an bugto ha gatas ni Maria Clara.
— Diri —binmaton an ginpakianhan: —sayod la ako nga mahal kuno ito sumukot, nasiring hi Kapitan Tiyago.
— Kun sugad, maupay mamulong!— ngani Andeng; —an nagbusbos kan Da. Maria mahal man sumukot, salit kay makinaadmananon.
