-Hay! kanugon na nga waray pa hadto kasasakit hi Clarita nakasiring, totoo gud man an kasubo, ngan atubangon hi Linares, sidngon:
-Nasayod ka, primo? Nakanhi kuno hi S. E.! Ano, matuod daw an kan De Espadana pagsiring nga diri kay balay la hin usa nga waray haros nga indiyo an imo kakadtuan! Kay masayod ka. D. Santiago, nga inin amon patod sangkay ini didto ha Madrid hin mga ministros ug mga dukes ngan parakaon hiya didto ha balay han Conde del Campanario, (30)
-Balay han Duque de la Torre, Victorina, han iya bana.
-Amo na gad, pagsusumatan mo pa ako!...
-Igkakita ko ada yana nga adlaw hi P. Damaso didto ha iya bungto? sinmagbang hi Linares, say inaatu-bang hi P. Salvi; nasiring nga haraniay la kuno dinhi.
-Hingan hahani ito yana ha bungto ngan makanhi ngani, diri maiha, binmaton an padi.
-Maupay kun sugad! May ada ko dara ha iya nga surat. — sinmiring an batan on, ngan kun diri la tungod hinin makawiwili nga higayon nga akon paghinganhi, say ko hiya anay tinutuyo pakigkita.
Dida hadto nagmamata man an makawiwili nga higayon.
-De Espadana?- ngani Da. Victorina, katapos han pamahaw, kitaa ta hi Clarita! -ngan atubangon hi Kapitan Tiyago: Tungod la ha imo, D. Santiago, tungod la ha imo! Inin akon bana diri nagtatambal kun diri mga tawo nga may kategoriya, ngan bisan pa ngani, bisan pa ngani! Inin akon bana diri sugad hinin mga taga dinhi...ha Madrid diri hiya nakadto kun diri mga tawo la nga may kategoriya!
Napasingadto hira ha sulod han masakit.
Masirumsirom ha sakob, mga tinakpan an mga tangbuanan paghirot han bulos han hangin ngan an gutiay nga suga nga nakakapawa gumikan la didto hin duduha nga kandila nga nanhihitagdok ha tungod han ladawan han Virgen ha Antipolo.(31)
Binubutok an ulo hin panyo nga hinulos hin kolonya, pinuputos an lawas hin mga busag nga taplak nga haglapad an pilo, nga nakakatago han magtahom nga lirik han iya lawas, nahigda an batan'on nga daraga dida han iya katre nga kamagong,(32) ha butnga hin mga biray nga husi ngan
