ginpamamanyakan ako, nganiya diri kuno hiya magbabayad, kay pati kuno hiya nahauupod na kamatay, kay an sayop amo adton inugay ngan waray palad ko nga bugto. Kakulop binmalik ako pakighimangraw, waray ko na hiabuti
kay nalakat na ha Manila, binilinan na la ako hin limos nga
lima kagatos kapisos ngan ginpatugunan ako nga diri na
bumalik! Pastilan, padre, lima kagatos kapisos, pastilan
daw, padre!...
An padi nagpinamati anay ha iya hin tuudtuod ngan tikaiha inabat ha iya mga im-im in tawa nga kanan kangalas ug pagtamsak han pagkita hadto nga bulurot nga kaagi nga iginpapaguwa, nga kun hinkit'an hiya ni Lucas bangin kun pinmatadog paglikay.
-Ngan ano man imo karuyag, ikaw? — ginpakianhan ngan talikdan.
-Pastilan, padre! tungod sa Dios sagduni gad ako kun ano akon bubuhaton; nahaaara ako han kanan padi mag-upay gihapon nga mga sagdon.
-Hino in nasiring ha imo? Diri ka dinhianon...
-An padi kilala dinhi ha bug-os nga lalawigan! Dinaop hiya ni P. Salvi, nagdidingga an mata, ngan itutdo kan Lucas an hagdanan, nganiya:
-Uli ngan pagpasalamat kan D. Crisostomo nga waray ka ipabilanggo! Lusad! Hi Lucas nahangalimot han iya komedya ngan nagngurutob: sang.
-Hunahuna ko adto nga... —Lusad na! — sininggaakan ni P. Salvi hin makalilisang
-Makikihimangraw ako kan P. Damaso!...
-Hi P. Damaso may buhat... lusad na! inmagda liwat an padi hin waray baribad.
Hi Lucas linmusad nagnginginurutob:
-Ini amo gihapon... diri ngani bumayad hin maupay... An bumayad hin maupay...
Dara han mga tingog han padi nanaop ngatanan pati hi P. Damaso, hi Kapitan Tiyago ngan hi Linares.
-Uusa gad nga laag nga waray haros nga nakikilimos, diri buot magbuhat!- ngani P. Salvi nga pinmurot han kalo ngan han tungkod paglusad tikadto ha kombento.
