—Ngan kun diri pa kami, —sinmagbang hi Da. Victorina, —hi Clarita aadto na yana ha langit nag-aawit han kahimayaan sa Dios.
—Amen Hesus!—nakasiring hi Kapitan Tiyago nga ini angay isumpay.
—Palad mo nga an akon bana nawaray masakit nga haruhataas in kategoriya kay kun nasugad, nakakatawag ka hin iba, ta, dinhi ngatanan ubos diri nananabot; an akon bana...
—Nagsiring na ako ngan igsisiring ko liwat, —say man binmul-ang an padi: —nga an pagkumpisal ni Maria Clara nakahatag hadto nga kahimtang han iya sakit nga amo an tinikangan han iya pag-upay. An pagkamahawan ha kalag nalupig han biisan ano nga bulong, ito nga diri ko riniriwa an gahom han kinaadman, labi na an Cirugia! Kundi, an malinis nga kalag... Basaha niyo iton mga barasahon ha tuluuhan ngan makikita niyo kun pira na ba in nabulong hin usa la nga maupay nga pagkumpisal.
—Tabi daw, pasaylua ako, ―rinmiwa hi Da. Victorina, nauurit; —mahatungod hiton gahom han pagkumpisal... hala daw, bulnga hin kompesyon iton asawa hiton alperes!
—Usa nga kasamdan, senyora, diri kay sakit nga mauupay han kalinis ha kalag!-binmaton hin maping-it nga tingog an padi; —kundi an pagkumpisal makakatalwas ha iya dida hin mga dabal nga sugad han gin-antos niya kanina han aga.
—Hayukat! —pinasundan ni Da. Victorina, baga su- gad hin waray la hiya bati han pinamulong ni P. Salvi.— Ito nga babayi uraura katampalasan! Didto ha singbahan waray nabuhat kun diri pagkinita ha akon, amo daw! usa la nga waray hangkag; hadton Domingo ginpapakianhan ko na unta kun kanan ano ba an dara ko nga bayhon, kundi hino in maghuhugaw pakighinimangraw hin usa nga waray kategoriya?
An padi, baga man la liwat in waray pakabati hini nga pamulong, nagpadayon:
—Tuod la ha akon, D. Santiago; basi mag-upay gud iton imo anak kinahanglan nga kumarawat buwas han aga, dudulungan ko nganhi hin viatico... ha akon hunahuna waray na gad man ada niya sadang igkumpisal, kundi... kun karuyag niya niyan nga gab-i magtimod...
—Ambot, —sinmumpay hadto dayon hi Da. Victo-
