—Hin waray pa ngani us'i kasimana tikang nagkukumpisal! rinmiwa hi Sinang. -Ako, nga diri ako masakit, diri ako sugad kamasukot makasala...
—Oy! diri ka maaram han siring han padi nga an matinumanon nakakapito pakakasala ha usa kaadlaw? Hala, ano, karuyag mo nga dad'on ko nganhi an Ancora, an Ramillete, o an Camino Recto para ir al Cielo?
Hi Maria Clara waray baton.
—Hala, diri ka gad gugul'an, —pulong han maugay nga dada, tuyo an paglipay ha iya; —ako in magbabasa ha imo han pag-isip han sala, an imo bubuhaton an panumdom na la han mga sala.
—Surati nga diri na magdumdom ha akon! —hinuringan ni Maria Clara hi Sinang han pag-ilalakat hini.
—Kay ano?
Kundi sinmulod an dada ngan hi Sinang pinmaantaw na la waray sabot han igintugon ha iya han iya sangkay.
An maupay nga dada binmutong hin lingkuran ngada han suga, nagbutang han iya salaming ha mata ngan bumitad hin basahan sumiring:
—Pamati hin maupay, iday; titikangan ko ha "Mga Sugo sa Dios"; hihinayon ko la basi ka makapamurubuot; kun diri ka makakabati hin maupay sisidnga ako basi liwaton; sayod ka man nga diri ako ginugul'an kun imo kaupayan.
Tinikangan niya hin pagbasa, hin mauyam ug maharaal nga tingog, an mga kasayuran mahatungod han mga hisaral'an nga higayon. Han pakatapos niya hin usa kapundok umukoy anay hin halawig basi an batan'on makapanumdom han iya mga sala ug magbasol.
Hi Maria Clara nagsisiniplat ha igbaw hin waray la tuyo. Katapos han siyahan nga sugo nga higugmaa an Dios labi ha ngatanan nga butang, pagkinitaon hiya han iya dada ha bawbaw han iya salaming nga natungtong ha irong, nga inmayon han kanan batan'on masamdungon ug mapainuinuhon nga dagway. Inmigham anay an tigurang ngan, katapos hin halaba nga kahilom, tikangan an ikaduha nga sugo. Daw kanan hinayagan an pagbasa han maupay nga lagas, ngan katapos han mga kasaysayan siplatan liwat niya. an iya umangkon nga binmirik han ulo hin hinayhinay ngadto ha luyo.
—Ah! —an isip ni Dada Isabel; —dida hinin pagpa-
