iday, tangis! kun masasayod ka la hiton akon kalipay pagkita ha imo nga nagtitinangis ka! Pagdabo ha imo dughan
kundi ayaw la duruha kay uul-ulan ka.
Lugaring tungod kay an kasakit basi dumugang kinahanglan an kamingaw ug kahimtang nga diri matukib, hi Maria Clara, han pagsabot nga hiniinawan hiya, inmukoy hin hinayhinay han pagpanhayhayon, nanmahid han iya mga mata hin waray tingol ngan waray bumaton kan iya dada.
Ini nagpadayon han iya pagbasa, kundi, tungod kay an pagtangis han iya mamarati inmukoy, nawad'an hin pangahas dida han urhi nga mga sugo iginpiraw hiya ngan iginhinuyam, inangyanan an maaningal ug mauyam nga tingog nga waray hipagpadayon.
—Kun diri la tungod kay ginkikinita ko diri ako matuod! nagpipinanmurubuot an buutan nga tigurang; ini nga bata daw an sundalo, nakasala kontra han siyahan nga lima nga sugo, kundi tikang ha ikaunom ngadto ha ikanapulo waray bisan usa nga gutiay nga sala, suhi lugod ha amon! Lain na gad man gud inin kalibutan!
Ngan magdagkot hin usa nga dako nga kandila ha Virgen ha Antipolo ngan hin duha nga gurugudti ha Ntra. Sra. del Rosario ug Ntra. Sra. del Pilar, iya anay kinuha ngan ipiliw in usa nga ladawan hin nagdudupa nga marpil, pagpasabot hini nga diri tungod ha iya an panagkuti hadto nga mga kandila. Amo man an Virgen ni Delaroche waray pairuga usa la hiya nga taga lain nga tuna nga diri kilala, hi Dada Isabel waray pa ha iya himantugi nga magpakita hin milagro.
Diri kita sayod kun ano in nahinabo han pagpakumpisal hadto nga gab-i; ayaw ta pagpasiparahi ini nga hilom nga mga butang. Nahilaba an pagkumpisal, ngan an dada nga didto ha antaw nagbabantay han iya umangkon, nakainaw nga diri lugod say han padi itinutungod an iya talinga han mga pulong han masakit, kundi inaatubang lugod ini, baga sugad hin karuyag niya basahon, o tiguhon man, an panhunahuna han daraga dida han iya magtahom nga mga mata.
Ginduduas ngan nagmumurusot ginmawas hi P. Salvi tikang didto ha sulod. Ha pagkita han agtang nga nagkukuriot ngan iginpapamamalhas, pakakasidngon nga hiya in say nagkumpisal ngan waray talwasa ha mga sala.
