Page:An-Kaduntan-Han-Bungto-ni-Jose-Rizal-1962.pdf/35

25 Ano, liwata daw? Maaram ka kun hino an akon amay? Ikaw nag ... — an batan’on nagpinakiana han militar nga iya kinakaptan dida ha butkon. —Pag-abat ko diri ako nagsasayop: hi D. Rafael Ibarra. —Oo, hi D. Rafael Ibarra! — namulong hin maluya an batan’on. —Hunahuna ko adto nga maaram ka! — namulong an militar dara in kapaid han pag-abat niya han nahinanabo ha sakob han kasingkasing ni Ibarra; — isip ko adto nga ikaw . . . kundi pakaisuga an imo buot! Dinhi diri namamaydungog an tawo kun diri anay nahangangadto ha bilangguan! —Angay ako magmatuod nga diri ka ha akon nagtitiaw, — an mahinay nga baton ni Ibarra, katima hin pira kadali nga waray yakanyakan. —Makahimo ka ha akon pagsumat kay ano in kabilanggo? An tigurang baga namurubuot. —Nahatitingala ako nga waray ka gud pagsayuri han nahanabo ha sakob han imo pagkabalay. —An iya urhi nga surat, nga may usa na katuig ngada yana nasiring nga diri la ako mabaraka kun diri hiya makagsurat kay may damo niya nga inaatubang nga buruhaton: nagtugon la nga magpadayon ako pag-aram . . . iya ako binibindisyunan! —Ta, kun sugad, dida ito niya pagsurata han waray na kaiha mamatay: diri na maiha tumagmo tikang namon iginlulubong didto ha iyo bungto. —Makahimo ka pagsumat kun ano an hinpatungdan han kabilanggo han akon amay? —Waray kabillinggan; usa nga hinpatungdan nga nakakapadungog. Kundi upod ha akon kay tipakadto ako ha kuwartel; igsusumat ko ha imo hamtang kita maglalakat. Sarig ha akon butkon. Nagkinalakat hira anay hin mahilom: an tigurang baga nagpipinainuino, ngan nagpipinamulat hin kalambragan di­ da han mitaybitay han iya talinga nga iya ginkakaputkaputan. —Daan ka sayod kaupay, — nagtikang hin pamulong; —nga an imo amay asya an labi kamanggaran dida ha lalawigan, ngan bisan kun hiya hinihigugma ngan gintatahod han kadam'an may iba nga nasisina, o naaawa, han iya kamutangan, Usa nga maraot nga palad nga kami an kat-