lat an maghais nga bulang, makangingirhat, magilangilang.
An duduha nga magbugto pinmaharani han alad, mag- biduon ngan waray yakanyakan, ngan managkinita na la, idinuduon an ira magkasi agtang dida han alasid.
Usa katawo dinmaop ngan hinmuring ha ira.
- Pare, gatos kontra napulo, ha ugis ako!
Siniplatan ni Tarcelo hin kanan lurong. Siniko ni Bruno nga binmaton la hin ngurob.
An mga soltador nanngapot, hin batid nga kakapot, han ira magkasi manok, hinihirutan nira nga diri hira masamad. Waray may nagluluya: labot han duha nga soltador, pakakasidngon nga an mga tambong mga tawutawo la nga taro. Idinuduok in usa nga manok ngadto han kaaway, kinakaptan an ulo ngan pinatutusikan basi mangisog, ngan katima pinabubulos, say man pinatutusik: ha ngatanan nga away kinahanglan nga mamay-ada pagkatimbang, mamanok ha Paris, mamanok ha Pilipinas. Katima ginsusungo, ginhaharani an magkasi bayhon, salit an mga hayop naggigikilala kun hino an tinmusik ngan kun hino an igkakaaway. Nanmamarat an barahibo ha liog, naggigipamugdat ngan namamaglaga hin kasina an maglidong ug gudti nga mata. Amo na an uras: binuhian hira ha tuna, ginantaw ngan gin-iwasan.
Naggiduok, hinayhinay. An ira pitad binabati dida han matig-a nga tuna; waray may nagyayakan, waray naginhawa, namamagtinangutango han ulo, maikmat an mata, an duha nga manok namamagngurob, tingali naggigipataru-tarhog, o naggigipatamaytamay ba. Nagpapakasiplat han mag-inggat nga bulang nga dapit mahagkot ngan tagumon an silaw; an kataragman nakakaaghat ha ira ngan dagos pagtiduok, kundi ha tig-usa na la kapitad an ira kaantaw nangukoy ngan diri nagbubulag hin kita, itinutungok an tuka, nanmamarat hin duro an mga barahibo. Hadto nga dalikyat an ira gudti nga utok linumpan hin dugo, sinmukob an kapintas ngan, dara han ira kinaiya nga kaisog. naglabok; nagpurok an magkasi tuka, an magkasi dughan, an magkasi salsalon ngan an magkasi pako: an mga pukpok nagkasasagang hin maupay ngan may pira la nga barahibo in nataktak. Binmalik liwat paggisiplatay; waray kaiha lumupad an ugis, pinmagimlat han matarom nga bulang, kundi an pula inmubo, itinungok an ulo, ngan an ugis ha hangin la pakaigo; kundi, han paghugdon, paghi-
