mga kadalanan han bungto, gin-uusa ug gindudulog han kadam'an. An ira patod, hi Linares, pinmabilin ha balay.
―Kamagraot hinin mga balay hini nga mga indiyos! ―tinmikang hi Da. Victorina, nanyayam-id; ― ambot kun inuunano nira in pangukoy hito dida: mga indiyo gad man gud. Ngan kamagraksot pa ba hin batasan ngan kamangapalabilabion! Iginhihisugat ha aton diri ngani nanunukas han kalo! Paspasi na gud dida ha ulo, ba man iton kapadian ngan hiton tenyente han Guardia Civil amo man ito an binubuhat; panutdui hin batasan.
-Kun bulson ako? nagpakiana an Dr. de Espadana.
-Lalaki ka man ada!
-Pi...piol ako!
Hi Da. Victorina nagtitikaurit: an mga kalsada diri binatuan, ngan an ikug-ikog han iya panapton napupuros hin taputapo. Labot pa, iginhihisugat hin kadaragan'an nga nananamod la, diri nasiplat pagdayaw, kay amo an angay, han iya makaruruyag nga panapton. An kotsero ni Sinang nga nagdudulong hini ngan han iya patod dida han ira makaruruyag nga tres-por-ciento.(¹) tungod han kawaray batasan ginmuliat pa ha iya hin "tabi!" hin dako nga tingog nga kinalasan hiya ngan nakapamulong: "Kitaa la hin kabanyaga hito nga kotsero! Sisidngon ko iton iya agaron nga pagtutduan hin batasan iton iya mga suruguon".
-Panguli kita ha balay! nagsiring han iya bana.
Ini nga nahadlok hin lipakan binmirik dayon dida han iya muleta ngan magsugot han sugo.
lginkakita hira han alperes, nagsipagkatahod ngan nakadugang han kangaralson ni Da. Victorina: an militar diri la kay waray gud dayaw han iya pamanapton, kundi kay ginkinita pa ngani, naghipahiyom hin badyangas.
-Diri ka unta angay makiglamano hin usa la nga alperes, siniring an iya bana han paghiantaw han usa;- an tuman nga tinmudlok han iya kapasete ngan ikaw tinmukas ka han imo kalo; diri ka maaram magdara hin pagkatawo!
-Hiya an la... labaw dinhi!
-Kay maano? Ano kita, mga indiyo?
-Kamatuuran! binmaton kay diri buot hin buruka.
Inmagi hira ha tungod han balay han militar. Hi Da. Consolacion nakada ha tangbuanan, sugad han kabatasa-
