nan, napranila ngan nainunay. Kay habubuay man an balay, naggisiplatay hira, ngan hi Da. Victorina nakatutok gud hin maupay ha iya: an Musa han Guardia Civil nagkikinita ha iya hin waray la kaalantad, tikang ha tiil ngadto ha ulo ngan katapos, palamnion an im-im, linmura ngan ibirik an bayhon ngadto ha antaw. Waray na ngahaw pakailob hi Da. Victorina; binayaan an iya bana nga nawaray na kinakaptan, binmudadong ha tungod han alperesa, nakibig hin kasina ngan waray na pakakayakan. Hi Da. Consolacion binmirik hin hinayhinay han iya nawong, binalik niya pagkinita hin waray kaalantad an usa ngan lumura liwat hin labi pa nga pakayubit.
-Ano imo, donya?― pinmakiana,
-Makakahimo ka hin pagsumat ha akon, senyora, kay ano nga ginkikinita mo ako hin sugad hito? Naaawa ka?― nagyakan hi Da. Victorina, kataliwan.
-Ano? naaawa ha imo? nagsiring hin badyangas an Medusa; oo! naaawa ako hiton imo mga pakurong!
-Tana, udoy!-ngani han doktor; ayaw hito pa.... pag-asa!
-Bayi, kay pakikilalahon ko ini nga layaw nga waray alo! binmaton an babayi, itinikwang an iya bana nga haros mahapaub-ob ha tuna, ngan atubangon liwat hi Da. Consolacion―Panginano kun hino imo iginkakaatubang! ―nganiya; ― bangin ka nakakasiring nga usa la ako nga probinsyana, o kerida hin mga sundalo! Ha amon balay, ha Manila diri nakakauswag in mga alpereses; nahulat ha suy-ab.
-Ola Ekselentisima senyora Puput! diri nauswag didto an mga alpereses kundi an mga piol la, sugad hiton iito, ha, ha, ha!
Kun diri pa ada tungod han barnis ha bayhon inaabat gud hi Da. Victorina nga namula hin kaawod: buot sakaon an iya iginkakabaton, kundi inulang han bantay. Igo man nga natitirok na in damo nga magkirita..
-Oy, pamati, napaubos ha akon an pakigbatunbaton ha imo; ha amon, han mga tawo nga may kategoriya... Karuyag ka maglaba hin akon panapton? Babaydan ta ikaw hin maupay! Nakakasiring ka nga diri ako maaram nga labandera ka la anay?
Hi Da. Consolacion tinmikig hin kasina: sinakitan hiya han kalabandera.
