―Nakakasiring ka liwat nga diri ako ha imo nakilala? Tara! ginsumatan ako han akon bana! Ginang, maupay na la ako kay usa pa la katawo in nakadara ha akon; ikaw? Kinahanglan nga usa nga patay-gutom an mag-iinilob paginantos hito nga sighot, hito nga baya ha kalibutan!
Nahaulo man ngahaw hini nga haplit hi Da. Victorina; nanlulo, kinumo an mga kamaoo ngan mangudyot, sinmiring:
―Lusad ngadi nga lagas ka nga kotsina, kay bubuungon ko iton imo mahugaw nga nasaragan! Kerida hin usa nga batalyon, layaw tikang ha kabata!
An Medusa nawara hin tigda dida han tangbuanan ngan waray kaiha hikit'an nga nalusad, nagdadalagan, nakakabitbit han latigo han iya bana.
Duro an pakimaluoy inmirog hi D. Tiburcio, nangangamaya; kundi nagkakapot gud kun waray abot layon an alperes.
―Kundi, mga senyoras... D. Tiburcio!
―Tutdui hin batasan iton imo asawa, ipalit hin magupay nga panapton ngan kun waray ka salapi, panikas dinhi ha bungto kay amo in pagtagi ha imo hin damo nga sundalo!―an guliat ni Da. Victorina.
―Aadi na ako senyora! kay ano nga diri pa ginuguba ni buestra ekselensiya inin akon nasarangan? Puro la nimo yawyaw, nagkakalaway ka la, Donya Ekselensiyas!
―Senyora!— ngani han alperes, nangingisog; ―igpasalamat nga nahanunumdom ako nga babayi ka, kay kun diri ginpapamamanyakan ta ikaw pati iton imo mga pakurong ngan hiton imo tinabas nga dugnit!
―Se... senyor alperes!
—Ikaw liwat, parapanmatay hin waray sakit! Diri saruwal iton imo gindadara, Juan Lanas ka!(2)
Ngan nagpatakas hin mga yayaknon, balingkutay, huyuay, gugliat, panampalas ngan buyayaw; ginhukad ngatanan an mga magraot nga hinipos,(3) ngan tungod kay nagdudurungan an upat ngan diri maisip an pinamamagyinakan nga nakakaraot hin magkalainlain nga tawo, tungod kay nanhihigawas in damo nga kamatuuran, diri na namon pag-aasuyon ngatanan. An mga magkirita, bisan kun diri nasabot han ngatanan nga pinamamagyinawyaw, nanhihikalipay ngan haros na la nira nga managkaputay.(4) An maraot la lugaring kay inmabot an padi ngan amo na in
