pagmingaw.
―Senyores, senyoras! Kamakaarawod! Senyor alperes!
―Nairog ka liwat dinhi, ikaw nga patootoo ka, karliston?
―Don Tiburcio, iuli iton imo asawa! Senyora, iukoy na iton imo dila!
―Say sidnga iton iito nga tikasan han mga kablas! Waray kaiha maubos an mga yayaknon nga waray haros, nahuman an mga panngaran nga diri naangay han tagsa nga magpadis ngan, hamtang naggigipadumutdumot pa gihapon ug naggigipaburubuyayaw, nagburublag hin hinay- hinay. Hi Fr. Salvi nadaop paluyluyo, dapit nag-aaghat; kun nakatambong unta an aton sangkay nga korresponsal! . .
―Yana ngahaw uli kita ha Manila ngan kadtua ta an Capitan General!— nagsiring hi Da. Victorina, naglililigsa, ha iya bana. ―Ikaw diri ka lalaki; kanugon la hiton imo pagsinarwal!
―Kun... kundi, udoy, iton nga sundalo? Piol ako!
―Inaayat mo hin pusilay, kun sablihay man, kun diri... kun diri...
Ngan siplatan ni Da. Victorina an ngipon.
―Waray pa ako, inday, kapot. . .
Waray na patapusa ni Da. Victorina: ha usa nga mapiskay nga kiwa rinabutan niya han ngipon an iya bana, dida ha butnga han kalsada, ngan pagtamakan. An bana haros nagtatangis ngan an babayi nagbubuto hin kangaralson. Sinmangpot hira ha ira balay. Hi Linares hadto nga uras nakikighimangraw kanda Maria Clara, Sinang ug Victoria ngan tungod kay waray hibaro han nahanabo, diri tiaw an kalisang han pakakita han iya duha nga patod. Hi Maria Clara nga nahapapahandig ha usa nga dako nga lingkuran, binangil hin ulunan, kinalasan han pakasiplat han lain nga kahimo han iya mananambal.
―Patod― ngani Da. Victorina, ―yana ngahaw ayaton mo hin pakiaway an alperes, kun diri...
―Kay ano?― pinmakiana hi Linares, nahapapausa.
―Ayaton mo yana nga uras, kun diri igsusumat ko dinhi ha kadam'an kun hino ka.
―Kundi, Da. Victorina!
An tutulo nga kadaragan'an nga magsarangkay naggisiplatay.
