hiya. Hiya man nagtalinguha pagpakita hin paghiayuni hin maupay sugad han nahihimo han kamutangan han iya kaburut'on.
―Asya ini an kali nga akon na la igindugang! ―sumat ni Nyor Juan; ini nga mga kali ha ilarom han tuna natadong ngadto hin usa nga luong ha mga ikakatluan kapitad tikang dinhi. Hagagamit ini nga abono han tanaman. Waray ini didto ha plano. Diri ka naayon hini?
―Ano in kadiri? Naayon ako ngan minamaupay ko ito nga imo nahunahunaan; amo ka an totoo nga arkitekto. Hino imo gin-adman?
―Hi ako la ngahaw, senyor, ― binmaton an tigurang mapinaubsanon.
―Ah! ugsa ko hingalimtan, sumati iton mga maghiniruton, bangin kun namamag-alang pakigkayakan ha akon, nga diri na ako eskomulgado. Ginkumbida ako han arsobispo hin pagkaon.
―Ah, senyor, diri kami hito nag-aasa! Kita ngatanan mga eskomulgado; bisan hi P. Damaso amo man, kundi matambok man la ito gihapon.
―Kay ano?
―Kaiya daw la; may ada na usa katuig gintubal niya an kuwadhutor ngan iton kuwadhutor padi man sugad ha iya. Hino in nag-aatap yana hin mga eskomunyon?
Hi Ibarra nakasiplat kan Elias dida han mga magburuhat; ini, sugad han iba, nakigkatahod man, kundi dida han iya siplat baga may karuyag igsumat nga lain.
―Nyor Juan,― ngani Ibarra; ― dad'a daw nganhi ha akon an listahan mo han mga tawo?
Hi Nyor Juan nawara ngan hi Ibarra dinmaop kan Elias nga nagpupulawas hin usa nga dako nga bato nga iya ibinutang didto hin usa han mga karreton nga dusuduso.
―Kun matatagan mo ako mapira kauras pakighimangraw ha imo, pasingadto niyan nga kulupay ha ligid han danaw, sakay la ha akon baluto, kay may ada ko ighihimangraw ha imo nga dako kaupay nga pakalilibangan,― nagsiring hi Elias ngan pinmaharayo dagos han pakakita han tangdo han batan'on.
Hi Nyor Juan inmulpot dara in listahan, kundi kawang la an pagsinulsuga ni Ibarra; an ngaran ni Elias waray didto.
