Hi Ibarra nanamilit kay mapakadto pakigkita han magturutdo ha liburan.
Waray pa katutunod an adlaw nga sumakay hi Ibarra. han baluto ni Elias ha tangpi han danaw. An batan'on baga waray hiaayuni.
―Pasaylua la ako, senyor, ― an pulong ni Elias, puno hin kasamdong, han pakakita ha iya; ―pasaylua la ako nga nagpasipara pangaro ha imo hin pakigkita dinhi; karuyag ko lugaring igkahimangraw ha imo hin waray makakaulang, salit pinili ko ini nga lugar kay waray ha aton dinhi mamamati; ha sulod hin usa kauras makakapanguli kita.
―Nagsasayop ka, sangkay Elias, ― binmaton hi Ibarra nga nagtalinguha pagtawa; ―kinahanglan nga idulong mo ako ngada hiton iito nga bungto nga kinikita iton lingganayan tikang dinhi. Maraot nga palad in nagsusugo ha akon ngadto.
―Maraot nga palad?
―Oo; hunahunaa nga han pagtikanhi ko iginkita ko an alperes nga karuyag bumunyog ha akon; nahanumdom ako ha imo ngan maaram ako nga nakilala ha imo, salit basi la ha akon bumulag siniring ko nga ngada ako hito nga bungto, ngan kinahanglan nga aadto ako ha bug-os nga adlaw kay pamimilngon kuno ako niya buwas han kulop.
―Salamat han imo panhunahuna ha akon, kundi imo na la unta pinauupod, ― binmaton hi Elias hin kinaiya nga tingog.
―Kay ikaw?
―Diri gad ha akon makakakilala, kay hadto han amo la nga amon pagkakita diri makakahunahuna hin pagtigaman han akon bayhon.
―Kawaray ko palad!― nanhayhay hi Ibarra, nagpipinanumdom kan Maria Clara. ―Ano in imo tuyo ha akon?
Hi Elias linmingi paluyuluyo. Lawod na hira; natutunod na an adlaw ngan, kay didto hadto nga mga nayon an urhi nga pawa han kakurulpon diri nag-iiha, nagtikang dayon pagguop an kasisidman ngan an paggimlat han bulan nga kadayaw.
