―Senyor,― nagyakan hi Elias hin makatarag-ob nga tingog, ―magdadara ako han mga inuungara hin kadam'an nga waray palad.
―Hin kadam'an nga waray palad? Ano in karuyag mo sidngon?
Ha pira kapulong ginsayuran ni Elias han ira himangraw ngan han puno han mga tulisan, hinilom la niya an mga ruhaduha hini ug mga panarhog. Hi Ibarra namati hin maupay, ngan han pakatapos ni Elias hin panumat nagmingaw hin maiha nga hi Ibarra an siyahan magyakan.
―Kun asya ito, karuyag nira?...
―An pangiba han mga tulos dida han kasundaluhan, dida han kapadian, dida han panhukmanan, karuyag sidngon: nangangaro hira hin kinag-anak nga pangalinsakob han Pamunuan.
―Pangiba han tulos, tipaunano?
―Pananglitan: tagan magutiay nga pagtahod an pagkatawo, magutiay nga karig-unan an pag-ukoy han tagsa-tagsa, ibanan hin gahom inin may pusil nga kagamhanan, kuhaan ini magutiay han iya paglaladngan kay saki kaupay ha panlupig.
―Elias, ― binmaton an batan'on, ― ambot kun hino ka, kundi natatahap ako nga diri ka sugad la han iba nga tawo; nalutod ka kaupay han iba ha panhunahuna ug pagpangiwakiwa. Masabot ka ha akon kun sidngon ta ikaw nga kun maraot inin aton kahimtangan yana, labi na kun aton balyuan. Makakahimo ako pangaro hini didto han akon mga kasangkayan ha Madrid, bisan pa baydan, makakahimo ako pag-atubang ha Capitan General, kundi maaram ako nga didto ha Madrid waray mahihimo ngan inin Capitan General waray gahom ha pagpalakat dinhi hin bag-o nga mga turumanon, ngan ako liwat diri ako magpapasipara pag-atubang hin sugad nga buruhaton kay sayod ako nga, kun inin mga prayle may magraot nga mga buhat, hira asya in usa nga kasuruk-an, amo hira an siniring nga maraot nga kinahanglanon.
Hi Elias, dako an paghipausa, hinmungat ngan magkinita ha iya hin tutok.
―Natuod ka man ngayan liwat han sinisiring nga maraot nga kinahanglanon? ―nagpakiana hin nakurog nga tingog; ―natuod ka nga basi mahimo an kaupayan kinahanglan buhaton an maraot?
