maupay nga pagdara han indiyo kun diri tubal: (1) basaha la iton sinurat ni P. Gaspar de San Agustin, (2)
"An babayi nga paghukman hin sugad nga sirot mananampalas ha adlaw nga mataw'an han iya anak ini, labot nga nakakapahilaba han pahamaan, nakakaparaot han pagkairoy. An babayi, dara han kamaraot nga palad, naganak hin waray kakurian, ngan dara man liwat han kawaray palad, an bata binmusol. Kahagos hin duha kabulan tumanon an sirot ha dako nga kalipay han mga tawo nga nakasiring nga nagtuman hin usa nga turumanon. Kay diri na man nahamumutang an pag-ukoy dida hini nga kabukiran,pinmalagiw hiya ngan han iya duha nga anak ngada hiton sunod nga lalawigan ngan didto nag-ukoy hira sugad hin magbangis nga mananap: waray kapaid ngan waray napaid. An suhag, nga ha butnga hadto nga paghimakuri, nahanumdom pa han iya pagkabata nga malipayon, han nailob na, sinmulod katulisan. Waray kaiha an ngaran han mapintas nga Balat nagsarang ha ngatanan nga lalawigan, naginmakaharadlok han mga bungto, kay ha iya panimulos, iya ngatanan iginpapaagi ha salsalon ug kalayo. An manghod, nga dinuktan hin mahumok nga kasingkasing, nagilob han iya palad pag-inupud-upod kan iya nanay; kun ano an hiagian ha kagurangan amo an ikinabubuhi, iginpapanapten an ipilak ha ira han mga maglalakat; an iroy nawad'an han iya ngaran, kinikilala na la hiya nga tampalasan, bigaon, iginlibod: an anak ginngangaranan na la nga anak han iya iroy, kay tungod han kamatam-is han iya gawi, diri tinutuod nga anak han parapanunog ngan labot pa, an ngatanan nga karat'an sadang igtahap han mga indiyo. Ha katapusan, an bantugan nga Balat hindakpan ngan ginsuktan hin waray turos han ngatanan nga sala nga nabuhat, ginhukman han mga punuan nga waray magtalinguha pag- tutdo ha iya han ikauupay; ngan usa kaaga, han pamiling han batan'on kan iya nanay nga naiiha na didto ha panguha hin ulaping, iya hin-agian nga nahapapahuyang ha ligid han dalan ha tungod hin usa nga duldol, ha igbaw an paniplat, an mga mata nanhuhulwa, namumudlat. Nahanuyusoy an batan'on hin paghangad ha igbaw, pagsuls og han paniplat han minatay ngan kinita niya in usa nga gubong nga binibitay ngan didto ha gubong an nagdudurugo nga ulo han iya bugto!"
―Ginoo ko!― nakasiring hi Ibarra.
