―Kun pangaruon ko ito pagtitinawaan la ako.
―Kun pasarigon ka han bungto?
―Ayaw! Diri ako mga sano pa man mag-uuna han bungto hin pagkuha, hin igpapaagi ha kusog, hadton ginhuhunahuna han Pamunuan nga diri pa angay ihatag, diri! Kun mga sano kitaon ko an kadam'an nga gumamon hin hinganiban, mapasingadto ako pag-ugop han Pamunuan, kay an sugad nga kahimtang diri angay han akon tuna. Karuyag ko an iya kaupayan salit nagtitindog ako hin liburan; kay didto ko bibilnga ha pag-aradman, ha kauswagan; kay kun waray kapawa, waray dalan.
―Kun waray away waray man katalwasan! binmaton hi Elias.
―Diri ako naruruyag han sugad nga katalwasan!
―Kun waray katalwasan waray kapawa, ― binmaton hin tigda an paraulin;―nasiring ka nga diri ka nakilala hinin imo tuna, yana nagmamatuod ako. Diri ka nakita hinin away nga nagtitiharani, diri ka nakita hiton dampog nga igindadagtok ha antaw; an away didto pagtitikang ha mga lantugi basi unina lumugsong ha patag nga asya an paglalasawan han dugo; binabati ko an tingog sa Dios, ngan kairo han magpasipara pagsupil! Ha ira waray pag- surata an mga Kaagi!
Hi Elias baga binmalhin hin dagway: han natukdaw hiya, waray kalo, an iya mabakod nga panagway nga pinapawaan han bulan, daw hinmuram hin katingalahan. Iwinaklit an iya marabong nga buhok ngan magpadayon:
―Diri ka naabat nga ngatanan nanhihimangno? An paghimuuki nahagusan hin pira kagatos katuig, kundi ha usa kaadlaw linmilinti ngan an linti, han pakabungkag han mga butang nakahatag hin kinabuhi; tikang hadto, bag-o na nga mga tulos an inaatubang han mga kasingkasing, ngan ini nga mga tulos, nga yana naglalalag-in mag-uurusa mga sano nga adlaw kay pagbuot sa Dios. An Dios waray pagpuoy han iba nga tuna, diri man magpupuoy han aton; an aton hinungdan amo an hinungdan han katalwasan!
Usa nga kamingaw in sinmunod hini nga mga pulong. Nagtitiharani man an baluto ha sagni, dara han balod. Hi Elias an siyahan magyakan:
―Ano in igsusumat ko hadton namagsugo ha akon? ―nagpakiana, linain an tingog.
―Iginsiring ko na ha imo: nga ikinasasakit ko iton ira kasugad, kundi angay maghulat, kay an mga karat'an
