―Nakain ka han bug-os nga adlaw?― nagpakiana ini hin binatabata nga kahimangraw;―naggigiparupakiana kami ngan nasiring kami: "Napasingain daw ito nga kalag nga nabawi ha Purgatoryo?" Ngan an tagsatagsa ha amon tinmigo la hin lain.
―Mahimo ko hibaruan kun ano an imo tigo?
―Diri, usa ini nga sekreto, igsusumat ko na la ha imo hin kita la. Yana pagsumati kami kun nakain ka basi kami sumabot kun hino an nakatigo.
―Diri, usa man liwat ini nga sekreto, kundi igsusumat ko na la imo kun kita la, kun tumugot hira inin namamati.
―Kaiya daw la, kaiya! Uraura na la!― nagsiring hi P. Salvi.
Dinara ni Sinang hi Crisostomo ngadto ha usa nga ka- tapusan han ruwang; nalilipay nga gayod an daraga kay hababaro hin usa nga sekreto.
―Sumati daw ako, sangkay,― nagpakiana hi Ibarra; ―nasisina hi Maria ha akon?
―Ambot, kundi nasiring la nga maupay hingalimtan mo na la hiya ngan dayon pagtitinangis. Hi Kapitan Tiyago karuyag nga pumaasawa hiton iito nga tawo, sugad man hi P. Damaso, kundi hiya diri nasiring nga oo, diri man liwat nasiring nga diri. Kanina han aga, han nagpipinakiana kami kun nakain ka, ngan nagsiring nga tingali la nangungulitawo ka na hin lain nga babayi, nagbaton hiya pagkasiring: "Hinaot pa unta!" ngan magtinuok dayon.
Hi Ibarra nabuot.
―Sidnga hi Maria Clara nga karuyag ko igkahimangraw hin kami la ngaduha.
―Kamo la ngaduha?-nagpakiana hi Sinang nagkukuriot ngan nagkikinita ha iya.
―Hin kami gud la ngaduha, diri; kundi, nga diri ito magkikita.
―Makuri kundi ayaw kabaraka kay sisidngon ko.
―Ngan sano man ako kasasayod han baton?
―Buwas, kadto ha balay nga nga pa. Hi Maria diri buot nga mag-usaan la, salit unob kami nga upud-upod; hi Victoria igindidirig niya ha usa kagab-i, ha pagkasunod ako na man; buwas akon. Kundi, bay'i daw anay, an imo sekreto, diri mo la igsusumat ha akon nga amo ito an kaudganan?
