―Kamatuuran! Nakadto ako ha Los Banos; (2) mangangalubian ako, kay may isip ko hin pagtindog hin usa nga pabrika; hi imo tatay in akon kabulig.
―Amo la ito? Pastilan nga sekreto!―nakasiring hi Sinang hin dako nga tingog, baga sugad hin usa nga nagpapautang hin hataas in patubo nga ginlimbungan;―hunahuna ko adto...
―Hiruti! diri ako matugot nga imo igpasangyaw!
―Diri man ngani ako! ― binmaton hi Sinang nga nag- musdot.―Kun mauruupay unta, iginsusumat ko hadin akon kasangkayan; kundi, pamalit la hin lubi! Lubi! Hino in malilisang hin lubi?
Ngan dumalidali pag-iwas, nagtipakadto han iya kasangkayan.
Waray kaiha magsarit hi Ibarra paglusad han pag-abat nga an hiruhimangraw nagtitikamaluya; hi Kapitan Tiyago may dagway nga baga nabibigit, baga nalilipay; hi Linares waray pagyayakan, kundi nag-iininaw; an padi nagpapakamalipayon dinadamo la in himangraw. Waray na bisan hino han kadaragan'an may inmuswag.
An madampog nga langit nakapasirom han bulan; usa nga mahagkot nga hangin, mag-uruna han tidaraon nga Disyembre, say nagpapaspas han mga dahon ngan han taputapo dida han haligot nga dalan nga nasulsog ngadto ha panlubnganan.
May tutulo nga lambong nga naghuhuringhuring ha tungod han purtahan.
―Ginsiring mo hi Elias?― nagpakiana in usa nga tingog.
―Waray, sayod ka man nga makuri, nga diri mayakan kundi bangin gad la tampo ha aton, gintabagan ito ni D. Crisostomo han iya kinabuhi.
―Asya in akon pagtangdo, ― nagsiring an siyahan nga tingog; ―iginpabulong ni D. Crisostomo an akon asawa didto hin usa nga mananambal ha Manila! Ako in nagpatapod pagsaka han kombento kay gindudumtan ko iton padi.
