―Kami man han kuwartel basi sumabot iton mga sundalo nga hi adton itay may mga anak.
―Pipira kamo?
―Lilima; lima igo na. Iton suruguon ni D. Crisostomo nasiring nga kakaruhaan kami.
―Kun diri niyo mahimo?
―Sst!―nagsiring in usa ngan nangukoy ngatanan.
Kinikita dida han kasisidman nga nagtitidaop in usa nga lambong, nagliligid han alad: danay umuroun ngan lumingi ha iya luyo.
Ngan may hinpapatungdan ini nga paglingi. Ha iya luyo, ha mga ikakaruhaan kapitad tipaurhi, may lain liwat nga lambong, darudako, ngan baga uraura pa hin paglambong han nahauuna: an tuman la nga nasaping han tuna, nawawara la dayon, baga in kinakaon han baras, kun an nag-uuna naukoy, nalingi.
―Ginsusunod ako!― nakasiring an nahauuna;― ba- ngin la an sibil! Ba la nagbinuwa an sakristan mayor?
―Nasiring nga hahani kuno pagkikirita, ― an isip man han ikaduha nga lambong;―maraot gud in mga tuyo kay gintatago ha akon han duduha nga magbugto.
An siyahan nga lambong sinmangpot ngadto ha purtahan han panlubnganan. An tutulo nga nakadto nanaop.
―Amo kamo?
―Amo ka?
―Pagburublag kita kay ginsusunod ako! Buwas han aga makakarawat niyo an mga armas ngan buwas han gab-i amo na. An guliat asya ini: "Mabuhi hi D. Crisostomo!" Lakat na kamo.
An tulo nga lambong nagkawawara dida han mga kuta. An pag-aabot pa la tinmago dida ha luyo han sada ngan maghinulat, waray tingol.
―Kitaa ta kun hino inin nagsisinunod ha akon!― nagsiring.
An ikaduha nga lambong inmabot, hinayhinay, ngan inmukoy ngan mag-usisa paluyuluyo.
―Naurhi ako!― namulong hin gutiay nga tingog; ― kundi, man gad pa mamalik.
Ngan tungod kay nagtatarahiti ngan baga may kaiha paghuraw, nakaisip hin pagsirong ha may purtahan.
Kaiya na gihapon iginkita didto han usa.
