kalingkuran. An haruhamubo hinmukad dida han iya takukong hin baraha, an usa nagbag-id hin puspuro.
Han pagparawa maggisiplatay, kundi dida han ira pangilos inabat nga diri hira magkilala. Kundi kita, makilala kita kan Elias nga amo an haruhataas ngan kanan dumakun'on an tingog, ngan hi Lucas an gutiay tungod han iya ulat ha bayhon,
—Alsa!—nagsiring inin urhi, waray bubulagi hin kita. Iwinas-ig an mga tulan nga nakadto ha bawbaw han pantiyon ngan humugot hin alas ngan hin kabayo. Hi Elias nagbibinagnis han puspuro.
—An kabayo!— nagsiring ngan bawbawan niya an baraha hin usa nga gutuguto.
—Ando!— nagsiring hi Lucas, ngan ha ikatulo o ikaupat ba nga baraha gumawas in alas.
—Pirdi ka,— nagsiring; —lakat na basi ako makagpakabuhi.
Hi Elias, waray aringasa, pinmaharayo, nawara dida han kasisidman.
Waray kaiha tumuktok hin animas an urasan didto ha singbahan kundi hi Lucas waray pakisugal bisan kan kanay, waray panawag han mga minatay, sugad han nahasusugo han diwata, kundi tinmukas han kalo ngan magngurob hin mga pangadion, nangudos daw an puno han Kopradiya han Santisimo Rosario.
Han bug-os nga gab-i waray pugtas an tarahiti. Ha mga ikasiyam an takna masirom na ngan mamingaw an kadalanan han bungto; an mga surugaan nga lana nga turumanon han tagsa nga bumabalay hin pagbitay ha gawas han iya balay, an tuman nga nakakapawa ha may usa kametro kaantaw: baga in pinanmaruktan ha pagpakita la han kasisidman.
May duduha nga sibil nga nagsusuduysudoy, pabalik- balik han kalsada ha tungod han singbahan.
—Kahagkot!—nagtinag-alog in usa nga kanan bisaya an tingog: wary ta na nadadakop nga tanod, waray nag- aayad hiton manukan han alperes... Tikang mamatay an usa, nanhimaan; mauyam ko ini.
—Pati nakon, — binmaton an ikaduha; —waray na- ngangawat, waray nakikiaway; kundi, salamat udog, nasiring nga iton hi Elias hahani kuno ha bungto. Nagsiring an
