alperes nga an makadakop ha iya diri malalamba ha sulod hin tulo kabulan.
—Aha! Natatanog mo an mga tigaman hito nga tawo? —nagpakiana an bisaya.
—Kaiya! an tindog hataas, nasiring an alperes, igo la, nasiring hi P. Damaso; an panit kayumanggi; mata itom, irong igo la, baba igo la; barangas waray, buhok itom
—Aha! an mga tigaman nga kalugaringon niya?
—Bado nga itom, sarwal nga itom, parapangahoy...
—Aha! diri makakalahos; baga sugad hiton ginkikinita ko na.
Ngan an duha nga sundalo nagpadayon han ira lakat-lakat.
Dida han pawa han mga parol aton liwat hikikit'an in duha nga lambong nga nagsusunod hin mahinay. Usa nga tigda nga "quien vive!" nakapaukoy han duha ngan an nahauuna binmaton: "Espana!" hin kanan nakurog nga tingog.
Gindanas han mga sundalo ngadto ha tungod hin usa nga parol pagkilala. Amo hi Lucas, kundi an mga sundalo nagruhaduha ngan naggisiplatay anay.
—An alperes waray pagsiring nga may ulat ha bayhon!— namulong an bisaya hin gutiay nga tingog. —Ngain ka?
—Nadulong ako hin misa para ha buwas nga adlaw.
—Waray ka igkita kan Elias?
—Diri ako hito nakilala, senyor!— an baton ni Lucas.
—Waray ako papakiana kun kinikilala mo, lurong! Kami diri man hito nakilala; napakiana ako kun hinkit'an mo.
—Waray, senyor.
—Pamati hin maupay, susumatan ta ikaw hiton mga tigaman. An tindog, usahay hataas usahay igo la; an buhok ngan han mga mata magkasi itom; an iba ngatanan igo la, —nagsiring an bisaya. —Yana kumilala ka na?
—Diri; senyor!— binmaton hi Lucas, nalulurong.
—Ta hala sulong, baboy, mananap! - ngan itikwang.
—Maaram ka kay ano nga an alperes nasiring nga hataas hi Elias, an padi nasiring nga igo la?—nagpakiana han. bisaya an tag-alog nga nagpipinamurubuot.
—Diri.
