—Tungod kay an alperes nahalulubong ha lutak han pakakita ha iya.
—Matuod ito!— nakasiring an bisaya; —maupay inin imo ulo... kay ano nga nagsibil ka?
—Diri ako anay sibil; hadto kontrabandista ako, — nagbaton an usa, dako an buot.
Kundi may usa liwat nga lambong nga nakalibang ha ira: ira gin-quien vive ngan gindara ha kapaw'an. Amo na ngahaw hi Elias.
—Ngain ka?
—Naglalanat ako, senyor hin usa katawo nga nagsuntok ug nagtarhog han akon bugto; may ulat ha bayhon ngan ginngangaranan kan Elias...
Ha?— naghinsiring an duha nga sundalo pinanngalasan.
Ngan hadto dagos magdadlagan tipakadto ha singbahan nga asya an nawad'an ni Lucas diri pa la hadto maiha.
Aga na mahasamwak ha bungto an sumat nga kagab-i hinkit'an in damo nga suga ha panlubnganan.
An puno han V. O. T. nasiring nga mga pinaruktan kuno nga kandila nga magkalainlain an kadagko, kundi diri maaram kun pipira gud, matuod may naihap niya nga labis hin karuhaan. Hi Hermana Sepa ha Confradia han Santisimo Rosario waray tutugot nga say la makakita han gawad sa Dios in usa nga kaapi han kaaway nira nga katig-uban hi Hermana Sepa, bisan harayo an inuukyan nakabati hin mga nguyngoy ug mga araba, ngan nakakilala pa ngani hin usa nga tingog hin mga tawo nga iya ha una nga mga panahon.... kundi an pagkaluoy nga kristuhanon, diri la kay iginpapasayko kundi ipinangangadi ngan hinihilom an mga ngaran, salit sinisiring hiya han iba nga santas na. Hi Hermana Rufa, (matuod diri sugad kamaupay na pamatian) diri natugot nga hi Hermana Sepa la in makabati, hiya diri; salit nag-inop nga inulputan hiya hin damo nga kalag, diri la kalag hin mga patay, kundi pati kanan buhi; an mga namamag-antos nga mga kalag nakikibahin han iya mga indulhensiyas nga tinirok. Mahihimo niya hin pagsumat an mga ngaran han mga urupod nga buhi pa ngan an iya
