—Malupig ka pa han mga celador ngan han mga hermanas, mason ka nga dako, irihis?(2)—asya an pulong ha iya, namamagdingga an tawutawo.
An padi sinmaka ha walihan ngan bumalik pagwali mahatungod han Purgatoryo ngan an mga tigpisos nagkagawas man liwat didto han mga pirit’an tipakadto paglimos hin misa.
Kundi bayai ta anay an nagkakauulang nga mga kalag ngan pamatii ta an himangraw nira D. Filipo ngan han tiguran nga Tasyo, nga masakit, didto ha iya balay. May ada na pipira kaadlaw nga an pilosopo, kun buang man, nga waray bubuhat ha higdaan tungod hin usa nga kamaluya nga nagtitikadugang la hin dagmit.
—Balitaw, ambot kun angay mo igmalipay min pagtuguti ha imo nga makaiwas ka; hadto, han diri pamati han gobernadorsilyo han tingog han kadam’an kaangayan; kundi yana nga iginkakaaway ka han Guardia Civil, diri kaangayan bayaan an hintutukdawan.
—Oo; kundi, kun naglilingo an heneral, diri— binmaton hi D. Fiipo; — sayod ka nga han pagkabuwas han aga pamuhian han gobernadorsilyo an mga sundalo nga akon ipinapanakop ngan waray na maruyag hin pagbuhat hin bisan pa ano mahatungod hini nga kasugad. Kun an akon labaw in dumiri, waray ko mahihimo.
—Kun ikaw la, waray, kundi kun tampo an kadam’an damo in mahihimo. lyo unta init nga higayon ginpapahimulusan paghatag hin susgaranan han iba nga bungto. Kay labaw han waray angay nga kagamhanan han gobernadorsilyo, aada an katadungan han bungto; asya unta adto an tinikangan hin usa nga maupay nga pagsurundan, kundi iyo ginpalahos.
—Ano ngani in mahihimo ko nga iaato hiton panlawas han ngatanan nga tinuuhan? Kitaa hi Sr. Ibarra; tinmuod han mga tinuuhan han kadam’an, hunahuna mo ito natuod han ekskomunyon?
