30
an bantugan nga mananabang amo in inmatubang han kalipungan, hin kanan dati ug diri lupigan nga pagdara. Kun di an mga kaaway damo ngan an iba mga tago la ngan diri pinanngingilala. Duro an mga buwaon nga saksi ngan an ira mga butangbutang, nga ha lain nga tuna mapapapas unta ha usa kapulong nga suyat han abogado, dinhi daw namamay-lawas hin madig’on nga kamatuuran. Kun an abogado nakakalugos pagbagi han mga sumbong kun iya nahamumutang ha pagkatipatipa an mga saksi, nangungulpot liwat dayon in lain nga mga sumbong. Iginsumbong hiya nga nanlupog hin mga tuna ngan ginsuktan hiya hin mga kabaraydan; gintahapan hiya nga iginkakasabot han mga tulisan basi an iya mga hayop ug mga tanom diri paglabtan. Ha katapusan, ginsamok hin duro an kalipungan nga ha kahagos hin usa katuig waray na may naggigisabot. An hukom nahaiwas; inmabot in lain ngan bantog nga matadong, kundi palad gud man nga maraot nga waray la liwat kaiha; ug an linmiwan ha iya uraura kadudyaganon han mag-upay nga kabayo. An mga kabiduan, an mga kabudlayan ha buot, an maraot nga kamutangan didto ha bilangguan, o an kasakit man niya pagkita han damo nga mga bungalos, pinmahugo han iya madig-on nga lawas ngan dida tikanga han sakit nga diri nauupay kun diri didto ha lubnganan.(10) Ngan han nag-iikatarapos na ngatanan, han nag-iikataralwas na hiya didto hadto nga mga sumbong nga hiya kaaway han lugaringon-tuna ngan nakamatay han parapanukot . . . na matay ha bilangguan nag-uusaan la. Umabot ako naghihingutas na. An tigurang inmukoy, hi Ibarra waray hipapagyakan. Hadto gud naabot hira ha atubangan han kuwartel. An militar hinmunong ngan idinuhol kan Ibarra an iya kamot, namulong: —Batan’on, an mga talagudti nga kasayuran ipakiana na la kan Kapitan Tiyago! Yana maupay na la nga gab-i! Kinahanglan ako manginano kun may ada ba na hanabo. Ginumos ni Ibarra hin kanan paghinangop, waray yakanyakan, adto nga kamot nga kulang na hin unod ngan, waray aringasa, ginkinita niya an tenyente ngada han kawara ha iya mga mata. Hinminayhinay hiya pagbirik ngan iginkaigo nga may
