31
nalabay nga sarakyan, iya kinampay an kotsero. —Ngadto ha Fonda ni Lala!(1I) — an tugon niya han kotsero, an iya tingog an tuman la nga hinsasabutan.
—Tikang pa la ini sabuot ko ha bilangguan, — an isip han kotsero nga linmamba hin makusog han iya sangat nga kabayo.
V. USA NGA BITUON HA MASIROM NGA GAB-I
Hi Ibarra sinmaka ngadto han iya sulod nga nahadadapit ha salog, pinmakalingkod dida hin usa nga butaka, naaatubang niya an kapawngan nga naghahaluag ha iya paniplat tungod han binuksan nga tangbuanan. An tugbang nga balay nga nahatatabok han salog nagrararanggat tungod han damo nga mga suga ngan tikang didto naabot ngada ha iya sulod an malipayon nga tunog han mga turunggon nga dinulsan an kaurog. Kun an batan’on diri hadto nga gab-i uraura kagupong ha pamurubuot ngan na may gutiay la hiya nga kamausisahon, bangin hiya hinmaruyagan hin pagkinita, ginmamit la hin largabista, han nahananabo didto han ginpapawaan hin duro nga ruwang; bangin hiya hin-ayunan pagkinulaw hin usa hiton nauulpot la ha atubangan, dara han mahika, nga danay igpaguwa didto hiton dagko nga paguruwaan ha Eu ropa, nga ha panungatunga hin malanoy nga tunog hin orkesta nabutho ha butnga hin usa nga inuuranan hin pawa ug gin-kakataktakan hin bulawan ug mga diyamante, ha usa nga rinayandayanan hin sinidlanganon nga mga sabong, daw natungha nga langitnon, usa nga diri lawasnon nga napuputos hin masilhag nga panapton, nga nagtitikaharani hin haros diri nasaping ha bugha, nga daw inuupdan ug ginlilibutan hin mapawa nga dampog: ha iya atubangan nabuswak an mga bukad, narayhak an sayaw, nanhihimangno an mga arangay nga tunog ug an mga kapangon nga mga yawa, mga nimpa, mga unglo, mga tamyaw, mga manulunda, mga sagala ug mga pastores namamagsarayaw ha iya atubangan, namamagtuktok hin mga panderetas, namamagsarusalibot ug nanmumutang an tagsatagsa ha iya mga tiil han lunlon nira mga halad. Hi Ibarra nakakakita unta hin usa nga gimahusayi nga daraga nga ma-
