—Ha ngaran han Hadi, dadakpon ka namon! — nagsiring an sarahinto. —Kay ano? —Pagsusumatan ka na la didto, gindidid'an kami pagyakan.
An batan'on namurubuot nadaliay ngan, tungod ada kay diri hiya buot nga hisabutan han mga sundalo an iya pangandam ha pagpalagiw pinmalos hin kalo ngan magsiring:
Andam ha iyo pagburut'an! Sabuot ko diri ini maiha.
—Kun magsasaad ka hin diri pagdalagan diri ka namon gagapuson nagtugon ha amon an alperes, tungod la ha imo kundi, kun madalagan ka...
Ha dako nga paghipahungat han iya mga suruguon, hi Ibarra inmupod.
Hadto nga uras nakain man hi Elias?
Han paglusad didto ha balay ni Crisostomo magdinalagan sugad hin buang, waray sasabot kun ngain an turon. Nagtarap han kapatagan, inmabot ngadto ha kagurangan, dako an kapungot; naglilikay hiya han kabalayan, naglilikay han pawa, an bulan nakakaraot ha iya salit sinmurop ngadto han kakahuyan. Han didto na hiya, inmukoy nadaliay, lumakat na man, sulsog niya in mga dalan nga diri niya kilala, danay tumungko ha puno hin dako nga kahoy nagpapanangit dida han kabaknitan, nagkikinita hiya ngadto ha bungto, ngadto ha ubos nga nahuhumog han tubig, binabanawagan han bulan, ngan nauunat dida han patag! nalingkod ha ligid han dagat. An katamsihan nga pinangalasan, nagkakalupad; mga dagko nga kabog, ihaw, bukaw, namamag-arualapon dida han mga sanga, nanhuhuni hin maaningal, namamagkinita ha iya han ira maglidong nga mga mata. Hi Elias waray babati ngan waray ha ira pagkikita.
Baga sugad hin ginlalanat hiya han nangingisog nga mga lambong han iya mga ginikanan; nakakakita hiya ha tagsa nga sanga han makangingirhat nga singlot ngan han nagdudurugo nga ulo ni Balat, sugad han iginsumat ha iya ni iya tatay; baga hinpapakdulan niya ha tagsa nga puno hin kahoy an lawas han tigurang nga iroy; baga kinikita niya dida han mga lambong nga naghihiaruabyog an nabibitay nga mga tulan han gindarahugan nga apoy... ngan
