an mga tulan, an tigurang nga babayi ngan an ulo nagsasarabat hin pagsiring ha iya "Matalaw! bulsa kami!"
Hi Elias linmakat dida han bukid, dinmalagan, linmugsong ngadto ha dagat, nagtinara han baybayon, waray himumurayaw; kundi ngadto ha antaw, ha butnga han mga tubig, didto han dapit ginbuburungan han silaw han bulan, daw niya kinikita nga napabawbaw ug nag-aabug-abog in usa nga lambong, an lambong han iya bugto nga babayi nga nagdudurugo an dughan, nalulugayan han buhok.
Hi Elias nahapaluhod dida han baras.
—Hi ikaw liwat; — namulong, binayaw an mga kamot.
Kundi binmuhat, ngadto pagkikinita han burong, ngan nagtiduok ngadto hin hinayhinay, sinmugbo han tubig, baga sugad hin may ada niya ginsusunod. Ginlugsong niya an hanayhay nga kabakidlan han baybayon; harayo na hiya han sagni, tinatagahawak na hiya han tubig kundi naglilinakat pa, naglilinakat daw sugad hin ginkakabig hin usa nga diri kinikita nga makaruruyag. Naabot na ha iya dughan an tubig... Nag-aningal an binutubuto han mga pusil, napapas an lambong ngan an batan'on nanginano. Salamat han kamamingaw han kagab-ihon ug han paghiayuni han hangin, nababati gud niya hin maupay an binutubuto. Inmukoy hiya, namurubuot, inmabat nga nakadto hiya ha tubig; an danaw malinaw ngan kinikita pa niya an mga suga han mga payag han mga magkaralap ha dagat.
Sinmagka hiya ngan tumadong ngadto ha bungto, ano in tuyo? Hiya ngahaw waray sasabot.
An bungto baga in waray tawo; waray na may bukas han kabalayan; bisan an kamanampan, an kaayaman nga kanunay mangusig kun gab-i, nanluok, nagkahahadlok. An mabusag nga sanag han bulan napadugang han kamasam- dong ug kamamingaw.
Ha paghirot nga igkita hiya han mga sibil, nagtara hiya han mga sakob ug mga tanaman, dida ngani hin usa hini baga nakakita hiya hin duha nga dagway hin tawo: kundi nagpadayon la hiya, nagpanlalakbay hin mga alad ug kuta, ha dako nga panalinguha, pinmaabot hiya ngadto ha luyo nga katapusan han bungto ngan nagpadayon hiya ngadto han balay ni Crisostomo. Dida ha purtahan nakada an mga suruguon namamaghiruhimangraw ngan namamagbinasol han pagdakpa han ira agaron.
Han pagsabot niya han nahinabo, hi Elias pinmaharayo
