la pagkita han makalilisang nga tap-ong, an katapusan hadto nga balay nga gintahod han mga bagyo ha kamaihaan nga panahon.
Pinakapawaan pa gihapon sa Dios (1) an nahahadlok nga bungto.
An dalan nga naagi ha kuwartel ngan tribunal mamingaw ngan waray pa may maglalakat; an kabalayan baga in waray mga tawo. Kundi waray kaiha magharangkaol an pagbukas han sada nga kahoy hin usa nga tangbuanan ngan humangaw in usa nga ulo hin bata nga nagliliningi, ginpapaharuhalaba an liog paniplat bisan ngain... ngan plas!, an harapas hin anit nga tinmigda pagdapat ha panit hin tawo; an baba han bata nahibab, napiyong an iya mga mata, inmunlok ngan an tangbuanan natabunan liwat.
Kundi na may ada susgaranan; adto nga pag-ukab ug pagtabon liwat tingali hinbatian kay in usa liwat nga tangbuanan nagtikabukas hin hinayhinay ngan manangbo didto, hin hilit in usa nga tigurang nga babayi, kuros na ngan waray ngipon: amo hi Hermana Pute an nakasamok didto ha singbahan han nagwawali hi P. Damaso. An kabataan ug kalagasan nga babayi amo an mga panlawas han mga usyuso dinhi ha tuna: an kabataan tungod han panalinguha nga habaro, an kalagasan nga babayi tungod kay buot manumdom hin mga panahon nga una.
Sabuot ko waray may na-gahom paglagpak ha iya hin sinilas kay waray umunlok, sinmiplat ngadto ha hirayo, nagkukuriot, kinmughad, linmura hin malagapak ngan mangudos. An balay ha tugbang nagbukas man hin tangbuanan ngan manangbo hi Hermana Rufa, an diri buot maglimbong ngan diri man buot paglimbungan. An duha naggisiplatay nadaliay nanhiyom naggipakirukinhat ngan managpangudos liwat.
—Hesus! daw an misa-de-grasya, damo in pabuto! — ngani Hermana Rufa.
—Tikang han pagsulura ni Balat han bungto waray pa hanabo in sugad nga gab-i, — binmaton hi Hermana Pute.
—Kadamo nga buto, nasiring nga an ginsakupan kuno adto ni Pablo, an tigurang.
