harani ha tangbuanan; — iton tikang didto magpakapapaid iton mga sumat.
Ngatanan nahiling ngadto han gintutudlok: may gutiay pa nga aso nga natindog tipalangit. Ngatanan namamagbanabana, may naluluoy, may nangangalas.
—Kairo! — an pulong hin usa nga tigurang, an bana ni Pute.
—Oo! — binmaton ini; — kundi kakulop waray pag: pamisa mahatungod han kalag ni iya itay nga tingali kun labi pa han iba hin pagkasuruk’an.
—Kundi, ikaw, diri ka naluluoy...?
—Kaluoy hiton mga eskomulgado? Sala an pagkaluoy han mga kaaway sa Dios, nasiring an kapadian. Waray ka hinunumdom? Didto ha panlubnganan baga la in naglalakat ha sakob hin turil!
—Ada ta kay amo man la ito gihapon, turil ngan hin panlubnganan; — binmaton an lagas; —an ginkakalainan a kay uusa la nga klase hin mananap an nasulod han turil...
—Hala! — ginuliatan ni Hermana Pute; — imo pa inuugupan iton kinikita na nga pinasisirutan sa Dios. Abata na kun diri ka man liwat ipadakop. Pangagang-agang hin balay nga napupuklid — aber kun diri ka hidat-ugan.
Tungod hini nga pangatadungan an bana inmukoy.
—Amo ito!— nagpadayon an lagas nga sinang; —katima pagsuntok kan P. Damaso an pag-iparatay na man kan P, Salvi.
—Kundi, diri ka ha akon makakariwa nga maupay ini han gutiay pa.
—Oo, maupay, — binmaton an lagas; — kundi napakadto ha Espanya; ngatanan an nagpapakadto ha Espanya, han panhihiuli irihis, nasiring an kapadian.
—Aba! — nakasirmg an bana nga inmabat nga may iya ibubulos; —inin padi, iton kapadian ngan hiton arsobispo ngan hiton Papa ngan hiton Virgen, diri ito mga taga Espanya? Baa! mga irihis man liwat, baa!
Pinalad hi Hermana Pute kay inmabot in usa nga suruguon nga babayi nga nagdidinalagan, kinukulba ngan ginduduruas; amo na in nakakautod han lantugi.
—Aadto in hinikog ha sakob hinin aton sapit nga alad! — nagsiring, naghihingahinga.
