An kababayin'an namagpangudos; waray may nakakiwa dida han ira hinmumutangan.
—Oo, nagpadayon an suruguon, ikinukurog; — nangunguha ako hin utanon... hinmiling ako ngadto ha sakob han sapit nga alad panginano kun nakadto... say ko hinkit'an in tawo nga nagbibitatay; hunahuna ko hi Teo, an suruguon nga masukot ha akon humatag... dinmaop ako... panguha hin utanon, ngan kinita ko nga diri ngayan asya, lain la nga tawo, patay; nagdinalagan ako ngan...
—Kitaa ta daw. nagsiring an lagas nga lalaki, binmuhat; itutdo kami.
—Asa ngadto! ginuliatan ni Hermana Pute, ginunitan ha bado; aabutan ka hin maraot! Naghikog? hayukat ha iya!
—Buhii ako kay kikitaon ko; kadto ha tribunal, Juan. pagpasabot; man gad pa diri pa patay.
Ngan mapasingadto ha sakob, ginsusunod han suruguon nga babayi nga nagpipinasalipod ha iya luyo: an kababayin'an, pati hi Hermana Pute, sinmunod man, nagkakahahadlok, kundi karuyag man masayod.
—Aadto man, senyor, — nagsiring an suruguon nga inmukoy ngan tumudlok.
An nagbuburunyog inmukoy ha antaw, pinabay'an an lagas nga lalaki nga say dumuok.
Uusa katawo nga nabibitay ha usa nga sanga han santol naghihiabug-abog dara han halayahay han hangin. Ginkinita anay han lagas; hinkit'an niya an naninikig nga mga tiil ngan kamot, an panapton nga duguon ug an ulo nga napiloy.
—Away ta anay paglabti ngada han pag-abot han mga punuan, nagsiring dinako an tingog;-binmaskog na: maiha na nga napatay.
An kababayin'an nagtiharani.
—Amo ini an naukoy didto hadton aadto nga payag nga may duha pa la kasimana tikang naabot; kitaa la iton ulat ha bayhon.
—Maghimaya-ka-Mariya! - naghinsiring an kababayin'an.
—Panhahalaran ta?- nagpakiana in usa nga daraga, katima niya usisaha ngan pagkinitaa.
—Tuyaw! irihis! — ginbusaan ni Hermana Pute, — diri ka nahanunumdom han pulong ni P. Damaso? Pag-urit sa
