Dios an pag-ampo mahatungod hin usa nga nahulog ha impyerno; an naghihikog nahuhulog ngadto, waray baribad; salit diri ito iginlulubong hin bininditahan nga tuna. Ngan sinumpayan pa: — Daan gud la ako natahap nga ito nga tawo maghihikaraot; waray ko gud hisayuri kun ano an nabubuhian.
—Nakaduha ko hikit'i nga iginhihimangraw han sakristan mayor, nagmugo an daraga.
—Diri man ada mahatungod hin pagkumpisal ngan hin pagpamisa!
Nagdaop an mga higrani ngan ginlibutan han kadam'an an minatay nga nagbibitaybitay pa. Ha sulod hin tunga hin uras inmabot in usa nga agwasil, an direktorsilyo ngan hin duha nga kuwadrilyero; ira ginturusan an minatay ngan igbutang ha usa nga palpag.
—Inin mga tawo nagkakaiikag pagkamamatay, — nagyakan an direktorsilyo, nagtitinawa, hamtang nakapot han pluma nga nahasasang-at ha iya talinga.
Nagsukna hin magkarit nga pakiana, pinapag-asoy an suruguon nga babayi nga karuyag niya nga haupod hin kasalakban, dayon niya sisiplati hin magtarom nga mata, usahay dayon papag-angkuna hin pulong nga waray luwasa, tubtob nga kay nahadlok bangin hiya hadara ha bilangguan, nagtuok ngan magtug-an na la nga diri utanon an iya pinangunguha kundi... ngan hinihimo niya nga testigos hi Teo.
Hamtang ini nahananabo, usa nga umanhon nga nasadok ngan may birma nga dako ha liog, nag-inusisa han minatay ngan han pisi.
An bayhon han patay diri nangangapay; ha bawbaw han linuputan han pisi may duduha nga pilas ngan hin duduha nga kugis nga nanhuhupong; an lupot han pisi mabusag ngan waray dugo. Gin-usisa pa han maulit-ukit nga umanhon an bado ngan han saruwal, nakaabat nga taputapuhon ngan may mga bag-o nga kagis'an, kundi an labi nga iya hinpausahan asya an damo nga murusikos nga nanunukot han panapton abot ha liog, silyo.
—Ano imo ginkikinita? — ginpakianhan han direktor
—Nakita gad la ako senyor kun kilal'on ko ba, — nagsiring, nag-iturukas han sadok nga iya kinaptan pagpatamod man lugod.
