—Kay waray ka pakabati nga hi Lucas kuno ini? Ano ka, nakaturog? Nagkatatawa ngatanan. An umanhon nahakaalo, namaribad hin pira kapulong dagos iwas hinayhinay an lakat.
—Uy! ngain ka? ginuliatan han tigurang;-diri ito amo dida an agian; tadong ito ngadto ha balay hinin namatay!
—Hinmumuukan pa! — ngani han direktorsilyo, iya durugas; maupay takbuhan hin tubig.
An nanhihitambong nagkatatawa liwat.
Linmakat an umanhon nga nagdaot han paghitambong, ngan ngadto pagpadayon ha singbahan. Didto ha sakris- tiya nagpakiana kun nakain an sakristan mayor.
—Nakaturog pa! binaton hiya hin waray haros; diri ka maaram nga kagab-i gintikasan an kombento?
—Huhulaton ko la ngada han pagmata.
Ginkinita hiya han mga tanod hin waray pamatasan kay ginawian han mga tawo nga hiara panagraugdaugon.
Didto hin masirom nga piliw nakadto nahangangaturog an buta an luyo nga mata ha bawbaw hin usa nga lingkuran nga halaba. An iya antiyuhos nakada ha agtang nahasusulapot han haglaba nga buhok; an dughan nga pinangagatawan han gusok nabubukasan, naigbaw, naubos, dara han pagginhawa.
Linmingkod an umanhon didto ha harani andam hin pag-ilob paghulat, kundi nahulugan hin kuwarta, dinmagkot hin kandila ngan sumuhot pagtiwak ngadto ha sirong han lingkuran nga kinakaturugan han sakristan mayor. An umanhon nakaabat man liwat hin murusikos dida han saruwal ngan bado han nahangangaturog nga hadto ngahaw nagmata, hinmapyod han iya uusa la nga mata nga tuhay ngan atubangon an tawo hin maraot kaupay nga buot.
—Nagpapamisa ako, senyor! - namaribad an usa.
—Tapos na ngatanan an misa,-nasiring an buta, hinuruhumok an tingog kun karuyag ka buwas... mahatutungod han mga kalag ha Purgatoryo?
—Diri, binmaton an umanhon ngan dumuhol hin pisos
Ngan tutukon an tuhay nga mata han sakristan mayor siniring:
—Mahatungod hin usa katawo nga mapatay diri maiha.
