bawog nga kawayan amo an ginagam.it pagsarok han malubog, mabaho ngan mahugaw nga tubig. Natitirok didto ha sakob han timba in mga buong nga garamiton, mga sighot ngan bin mga hinugas, kay adto nga bubon o timba masugadsugad han bilangguan; an butang nga mahulog ngadto, bisan maupay pa, maghihikaraot. Kundi, bisan la, diri gintatak-upan: usahay say iginsisirot han mga binilanggo an paghunggad hadto nga timba, diri kay tuyo an pagkuha hin
himurulsan hadto nga sirot, kundi tungod la kay makuri nga buruhaton: an binilanggo nga makausa sulod ngadto dinuduktan dayon hin sakit nga amo an ikinamamatay.
Hi Tarsilo nagkikinita hin waray pirukpirok han mga pangandam han mga sundalo; ginduduas hiya ngan an iya mga im-im nakurog, o nahutib ba hin usa nga pangadion. An iya kadig-on ha butnga han iya maraot nga palad baga sugad hin nawara, kun diri man, linmuya. Nakadamo itungok an kanunay itinitigbaw nga ulo, nagtitinamod, pirit nga mag-iilob han ngatanan.
Gindara hiya ngadto han timba, bunyog hi Da. Consolacion nga nagtitinawa. Usa nga siplat ha kaawa iya itinadong ngadto han natatambak nga mga patay ngan in usa nga panhayhay ginmawas tikang ha iya dughan.
—Pagyakan na la! — binmalik pagsiring an direktorsilyo; — pagbibitayon ka manta ngahaw; bisan diri ka na la mag-antos hin maiha.
—Amigo, gumawas ka man dinhi patay,— ginsiring hin usa nga kuwadrilyero.
Ginkuhaan han gaom ha baba ngan bitayon ha tiil. Tutunuron hin tuwad ngan itutunlob ha tubig, sugad hin sarok, an ginkalainan la kay an tawo iniiruiha.
An alperes namiling hin urasan nga pag-iihapan han mga minutos.
Hi Tarsilo binitay na, natunton an halaba nga buhok an mga mata dapit pinipiyong.
—Kun mga binunyagan kamo, kun may ada kamo kasingkasing, — nangamaya hin hinay nga tingog, —dagmita na ako pagtunod, kun diri ipuspos inin akon ulo dida ha kuta basi ako mamatay. Pagbabalsan kamo sa Dios hini nga buhat ha kaluoy . . . Bangin mga sano masugad man kamo ha akon!
Binmalik ngadto an alperes ngan asya an naglarang han pagtunod, nabitbit hin urasan.
