420
—Hinaya, hinaya!—an guliat ni Da. Consolacion nga nagsisinunod hin kita han binitay; —hinay!
Hininayhinay pagbuhi han bawog; hi Tarsilo naghihiiruintok dida han nanlalabaw nga bato ngan dida han maghugaw nga banwa nga nanunubo ha mga kagihaan. Katapos an bawog waray na pagkiwa; an alperes nag-iinihap han mga segundos.
—Butunga tipaigbawli— nagsiring hin mamara nga tingog in usa nga kabo, kahagos hin tunga hin minuto.
An linapasak han turo han tubig nakagpasabot nga an makasasala nakada na liwat ha kapaw’an han adlaw. Ini nga paghibutwa niya natigda kay mabug-at an buntog nga bato. An mga bato ug mga banwa nga nagkakagagabot ha mga ligid nalinapasak ngadto ha tubig.
Putus hin malamiri nga lapok an agtang ug an buhok, an bayhon luob hin kasamdan ug mga kugis, mahulos an lawas ngan nagtututuro, inmutwal ha atubangan han kadam’an nga waray pagtitingol; an harupoy nakapakurog ha iya hin kahagkot.
—Mag-aasoy ka?— ginpakianhan han alperes hin hialang nga tingog.
—Mangnua an akon bugto nga babayi!—nagyakan, nangangamaya an iya paniplat, ha usa nga kuwadrilyero.
Nag-agutiot liwat an bawog ngan an makasasala linmurop liwat ha tubig. Hi Da Consolacion naabat nga an tubig waray pagkukuyakuya. An alperes inmihap hin usa kaminuto.'
Han pagbalik pag-utwal ni Tarsilo nangungupos na an bayhon ngan nangangapay. Sinmiplat han mga tambong ngan waray ipirok an mga mata nga nagpupurula.
—Mag-aasoy ka?— Binmalik pagpakiana hin waray paglaom an alperes.
Hi Tarsilo pinmiling ngan itunod liwat. An iya mga mata nagtikapiyong’ an iya tawutawo ngadto ha langit an tadong, ha langit ngan gin-aanuran hin magbusag nga dampog; pinilo an liog paglanat han kapawa han adlaw, kundi waray kaiha mataop ha tubig ngan an ngatanan ha kalibutan sinalipdan hadto nga waray haros nga biray.
Usa kaminuto in nahagos; an Musa kinmita nga an tubig nagbubuladbukad.
—Inuuhaw! — nganiya pa, nagtitinawa.
An tubig binmalik liwat paglinaw.
