421
Yana nahagos in usa kaminuto may tunga ugsa an alperes suminyas.
An bayhon ni Tarsilo diri na nanhihigos; kinikita dida han iya napupukrat nga mga mata an iya musagbusag; naguwa dida ha iya baba in lapok nga may sakot nga dugo; naharupoy hin mahagkot, kundi an iya lawas diri na ikinukurog.
Ngatanan naggisirusiplat hin waray tingol, ipinamamagduruas ngan daw an pinanlipakan. An alperes nagsu go nga hubaran ngan pumaharayo, nagtitinakmod; nakadamo idupo ni Da. Consolacion an kalayo han iya tabako dida han nawawalisan nga paa han binitay, kundi ini waray pagkiwa ngan naparong pa an kalayo.
—Naglumos na la ha iya ngahaw! —nagsiring in usa nga kuwadrilyero; — kitaa niyo iton dila kun diri ba napipilo, baga sugad hin iya gin-iilalam-oy.
An usa nga binilanggo nagkikinita hadto ngatanan, ikinukurog ngan iginpapamamalhas: naniniplat bisan ngain sugad hin tuyaw.
An alperes nagsugo han direktorsilyo nga pagsuknahon.
—Senyor, pastilan! — nag-iinuwang; — magsusumat na la ako han ngatanan nga iyo karuyag!
—Ta, hala daw; hino imo ngaran?
—Hi Andong, senyor!
—Hi Bernardo .. . Leonardo .. . Ricardo .. . Eduardo Gerardo .. . kun hino?
—Hi Andong, senyor! — nagsiring liwat.
—Isurat na la nga Bernardo, bisan ano, — naglarang an alperes.
—Apelyido?
An tawo nagkinita ha iya, nalilisang.
Ano nga ngaran pa an idinudugang han Andong?
—Pastilan, senyor! Andong Medio-tonto, senyor!
An mga tambong waray pakailob han tawatawa; bisan an alperes inmukoy han iya paglinakatlakat.
—Ano imo pagpakabuhi?
—Parapamisit hin lubi, senyor, ngan suruguon han akon ugangan nga babayi.
—Hino in nagsugo ha imo nga suluron mo an kuwartel?
—Waray, senyor!
