424
kay tungod han iya batasan hin pag-isip han kabubwason sugad hin inmagi na, daan na la hiya nagluto han pagkamatay ni Ibarra.
Ha mga ikaduha an takna ha ligas inmabot in usa nga karrumata nga waray atop, nga sinaog hin duduha nga baka nga tudo, ngan inmukoy ha atubangan han tribunal.
An karrumata ginlibutan han kadam’an: karuyag nira hukasan han sangat ngan gub’on.
—Ayaw kamo pagsugad—ngani Kapitana Maria;—karuyag niyo nga managbaktas?
Ini nakapaukoy han mga urupod, Karuhaan nga sundalo in ginmawas ngan naglibot han sarakyan. Nagkagawas an mga dinakop.
Hi D. Filipo an siyahan, ginapos; nakigkatatawa han iya asawa; hi Doray nagtinangis hin waray na sugad ngan nagkuri in duha nga sibil pagpugong ha iya nga humangkop han iya bana. Hi Antonio, an anak ni Kapitana Tinay, ginmuwa nagtitinuok baga in bata, salit pinmadugang la hin kabiduan han iya mga urupod. An lurong nga Andong nagngaab han pakakita han iya ugangan nga amo an tinikangan han iya kasugad. Hi Albino, an tipagparadi, ginapos man sugad han magkaruha nga anak ni Kapitana Maria. Ini nga tutulo nga mga batan’on nanmumuot. An urhi gumuwa hi Ibarra, diri ginapos kundi ginbubutnga hin duduha nga si bil. An batan’on iginduduas; naniplat pamiling hin usa nga bayhon nga kilala.
—Amo ito an may sala !— nadungog in kadam’an nga tingog; —asya ito an may sala diri lugod hinigtan!
—Iton akon umagad nga waray binuhat nga ano man pinatlong iton mga kamot.
Hi Ibarra nagsiring han nagbubutnga ha iya:
—Baklira ako niyo, baklira ako hin maupay, ha may siko!— nganiya.
—Waray sugo ha amon!
—Baklira ako! kun diri makalagiw ako!— nagsiring.
Nagsugot an mga sundalo.
An alperes inmabot nakabayo ngan luob hin salsaion haros pati ha baba may binanga; bunyog ha iya luyo in nanapulo, kun nanapulo ba kaglima, pa nga mga sundalo.
An tagsa nga dinakop may ada dida hadto nahatatambong nga urupod nga nag-iinampo tungod ha iya, nagtitinangis tungod ha iya ngan nagtitinawag ha iya hin mga
