429
—Salit ginugunitan, kinakabig han kamahalanguhang! — nabaton man in usa.
Ini ug iba pa nga mga yayangbaton asya an hiruhimangrawon ha mga kombento, diri na la namon ha mga bumarasa ig-aasoy an mga hinsasalaktan bin mga pulong ha metapisika, pamunuan, o mga pulong man nga magpakasisina. Dadad’on namon an bumarasa ngadto ha balay hin usa nga taghimungto ngan, kay ha Manila kulang kami hin kilala, ngadto kita tatadong ha balay ni Kapitan Tinong, an maabiabihon nga tawo nga aton hinkit’an nga nagpipirit kan Ibarra nga kumadto anay ha iya balay.
Nalingkod hi Kapitan Tinong ha usa nga dako nga lingkuran, didto han makaruruyag ug haluag nga ruwang han iya balay ha Tondo, naghihinaruhapyod han iya agtang ug han iya tangkugo sugad hin nagugupong, hamtang an iya asawa, hi Kapitana Tintsang, nagtitinuok ngan nagtitinugon ha iya duduha nga anak nga babayi nga nakadto ha usa nga piliw namamagpinamati ngan waray pananabot kun ano.
—Hay, Birhen ha Antipolo!— nagpipinanharoy. — Hay, Birhen del Rosario ug de la Korrea! hay! hay ! Nuestra Senyora ha Novaliches!
—Nanay!(7)— nakagmugo an manghod niya nga anak.
—Nasiring pa ako ha imo!— nagsiring an ginang. binabasol an iya bana; —nasiring pa ako ha imo! hay! Birhen del Karmen,(8) hay!
—Waray ka ha akon pagsisiring hin bisan la ano! — nagpasipara pagbaton hi Kapitan Tinong, mabiduon; — lugod nagsiring ka pa ngani nga maupay nga nagtuturutungbalay ako ha balay ni Kapitan Tiyago kay . .. kay salapian . . . ngan nasiring ka ha akon . . .
—Ano? Ano in ginsiring ko ha imo? Waray ako ha imo hito pagsisiring, waray! Hay, kun tinmuod ka gad ha akon!
—Yana ako imo ginsasala!— binmaton hin mapait nga tingog, dinmabo ha butkon han iya lingkuran; —diri ba nasiring ka nga maupay nga akon gin-abiabi pagkaon dinhi ha aton tungod kay salapianon . . . nasiring ka nga amo in angay ta pakisangkayan an mga salapianon? Tara!
—Matuod nagsiring ako hito ha imo tungod ... tu ngod kay waray ko na iba nga sadang mahimo; say mo na la gindidinayaw; Don Ibarra dinhi, Don Ibarra didto, Don
