435
—An liburan usa la nga pasasngilanan; an totoo nga karuyag pagtindugon asya in usa nga panalipdanan nga amo in ira pangangawayan kun aton na sulungon. . .
—Hesus! kawaray alo! Usa la nga indiyo in makakapanhunahuna bin sugad kawaray haros nga panhunahuna, — an pulong han matambok. —Kun ako in Kapitan Heneral, kikitaon nira . . . kikitaon nira . . .
—Amo man ako!— sinmubad an magasa, inaatubang an kimay. —Ipadadakop ko an ngatanan nga aruabogado, padipadi, komersiyante, waray papelpapel akon ipapapanhalin, kun diri man akon ipapapangusisa iton ira mga balay! Utdon an maraot tikang ha puno!
—Nasiring nga ito nga pirupilibustiruhay anak hin mga katsilaj— nagmugo an kimay, waray sisiplat bisan kanay.
—Ah, asya na! — waray padadaog an matambok; — say gihapon an mga kalibugan! Hain in indiyo nga nasabot hin paggubot? Pagpatubo hin uwak(28). . . hala!
—Sayod kamo kun ano akon hinbatian?— Nagpakiana in usa nga kalibugan nga ginang, ngan asya in nakautod han hiruhimangraw. —An asawa ni Kapitan Tinong. . . nahanunumdom kamo? An tag-ada han balay nga aton ginsarayawan ngan pinanihapunan hadton pagpatron ha Tundo.. .
—An may duduha nga anak nga daraga? Ta, ano man?
—Ada an asawa naghatag kanina han kulop ha Kapi tan Heneral hin usa nga singsing nga yuyukuton kapisos!
An kimay linmingi.
—Matuod ito? kay ano?— nagpakiana, nagdidingga an paniplat.
—An asawa nagsiring nga pinaskuhan . . .
—Uusa pa kabulan nga magpasko!
—Nahadlok tingali nga uranusan . . . —nakagmugo an matambok.
—Salit nasirong,— sinmumpay an magasa.
—An paghatag kun waray aarui, usa nga pagsumat hin kasal’anan.(29)
—Amo man an naiisipan ko; hintutultulan mo an akon hunahuna.(30)
—Kinahanglan panginanuon ito hin maupay, — nagyakan an kimay, nagpipinainuino: —natatahap ako nga may ada dida hini usa nga tinago nga karat’an.(31)
