444
Ha tangbuanan ngan ha agianan tipakadto ha pantaw(9) nasulod an silaw han bulan.
Waray hunong an pagtinuktok han mga balsi; napaabot ngadto ha iya higdaan an katatawa ngan an aningal han hiruhimangraw; nakadamo pagtuktok han purtahan han iya sulod hi iya tatay, hi Dada Isabel, hi Da. Victorina, pati hi Linares, kundi hi Maria Clara waray pagkiwa: naghuhuot an iya dughan.
Linmabay in mga uras; an mga kalipay ha tarangkaan natapos, hinbatian nga nagsisinaragyaw, nagkauupos an mga suga ngan nagkapaparong: nakadto pa, sinisilawan han bulan, waray pa gihapon pagkikiwa an daraga ha tungod han ladawan han Iroy ni Jesus.
An balay nagtikang hin pagmingaw, naparong an mga suga ngan hi Dada Isabel nagtawag liwat ha purtahan han sulod.
―Nahangangaturog ada! ―sinmiring dinako an tingog; ―tungod kay batan'on pa ngan waray mga kabarak'anan, baga in patay kumaturog. Han pagmingaw na ngatanan binmuhat hiya hin hinayhinay, naniplat paluyuluyo, kinita an pantaw, an mga binalayanan nga mga tanom nga binabanawagan han masamdong nga silaw han bulan.
―Usa nga himyang nga kabubwason! Tuok nga pagkaturog! ―nagmugo hin gutiay nga tingog ngan mapasingadto ha pantaw.
Nakaturog an bungto; say la hinbabatian, kun usahay, an kinaradol hin usa nga sarakyan kun nalabay dida han tulay nga kahoy nga nabalabag han salog nga inaaninawan han mapawa nga bulan.
Ihinangad han daraga an iya mga mata ngadto han maliaw nga langit; nanalso hin hinayhinay han iya mga singsing, nanhukas han iya mga ariyos, sudlay ug mga pinanta, ibinutang ngatanan ha hangbuyan han rihas ngan sumiplat ngadto ha salog.
Usa nga baluto nga puno hin kumpay naduong man ha may duruungan, ha tungod han tagsa nga balay nga aada ha ligid han salog. Usa han duduha katawo nga sakay han baluto hinmaw-as ngan sumaka han mga balitangan nga bato, linmayat han kuta ngan waray kaiha, aadi nagtitisaka han hagdan han pantaw.
