Page:An-Kaduntan-Han-Bungto-ni-Jose-Rizal-1962.pdf/458

448

nabubutnga hin kasisidman! Ambot kun ano in bubuhaton ko; kundi sabuta nga nakausa la ako hagugma ngan kun diri tungod hin gugma diri ako hangangadto hin bisan kanay. Ngan ikaw, ano in dadangatan mo?

—Usa la ako nga kalagiw ... malikay ako. Ha sulod hin pira kadali hisasabutan an akon pagkalagiw, Maria ...

Kinaptan ni Maria Clara an ulo han batan’on han iya duha nga kamot ngan hadkan nakadamo han mga im-im, hinangkupan ngan katapos iantaw ha iya hin tigda:

—Likay! likay!— nganiya; —likay ngan pag-upay na la . . .

Ginkinita anay ni Ibarra hin masiga nga mga mata, kundi ha usa nga sinyas han daraga an batan’on pinmaharayo, waray pakakatadong han paglakat.

Linayat niya liwat an kuta ngan sumakay ha baluto. Hi Maria Clara, nahangboy didto ha pantaw, nagkikinita han iya pagtiharayo.

Hi Elias tinmukas ngan kinmaob ha dako nga pagtahod,

______________ LXII. AN PALANAT DIDTO HA DANAW.

—Pamati, senyor, hinin akon nahuhunahunaan nga bubuhaton,— nagsiring hi Elias hamtang tinatadong nira an San Gabriel. —Tataguon ta ikaw ha balay hin usa ko nga sangkay ha Mandaluyong; dadad’on ko na la ha imo an imo salapi nga aadto akon kinuha ngan tinago ko ha puna han nunok, didto ha may linubngan han imo apoy; gumikan ka . . .

—Ngadto pag-ukoy ha lain nga tuna?— tinapos ni Ibarra.

—Pag-ukoy hin murayaw tubtob nga buhi pa. Damo imo kasangkayan ha Espanya, may salapi mo, makakapanalinguha ka nga pasayluon ka na la. Labi man ngani, an lain nga tuna mauruupay ta lugod pag-ukyan han aton lugaringon.

Hi Crisostomo waray baton; nagpinanmurubuot.

Hadto nga uras naabot hira ha Pasig ngan an ira baluto nagtikang pagsuba han salog. Dida ha Puente de Espanya may nagpapadalagan nga nangangabayo ngan binati in hilawig ug matil-is nga tunog hin silbato.