453
Hi Elias tinmamod han ule ngan manhayhay.
—Maupay! Makahimo ka pagdulong ha akon ngadta ha bukid?
—Tubtob ha pag-himutang mo hin waray kakurian! binmaton hi Elias.
Linmugwa hira liwat ngadto han Pasig. Nagsinakay hira hin waray tingol.
—Santa Ana!— nagmugo hi Ibarra, —nakilala ka hini nga balay?
Nahatutungod gud hira han urugyagan nga balay han mga hesuwitas.
—Dida hini nga balay nag-agi ako hin maglipayon nga adlaw!—nagsiring hi Elias. —Hadto nga panahon ikinabulan napakanhi kami . . . hadto nga mga adlaw, sama ako han iba; may salapi, may kaurupdan, nag-iinop ug naghihingyap hin kabubwason. Linalaoy ko an akon bugto nga babayi dida hiton sunod nga kolehiyo; iya ako tinatagan hin lunion bul-iw han iya kamot . . . may upud- upod niya nga iya sangkay, usa nga mahusay nga daraga. Ngatanan linmabay sugad hin inop.
Waray hira paghimangraw tubtob han pag-abot ngadto ha Malapad-na-Bato.(2) An nakagsakay nakausa, hin gab-i, han Pasig hin usa hiton magpakawiwili nga kagab-ihon ha Pilipinas kun mga bulanon; kun natatago ha kasisidman an mga karat’an han tawo ug an kamingaw nakakatahob han waray pulos nga mga pulong; kun an Pagkakinaiya asya la an namumulong ha bug-os nga ginlarang, makakasabot kun ano an nakadto ha sakob han mga hunahuna han duduha nga batan’on,
Didto ha Malapad-na-bato an karabinero pinipiraw ngan han pakakita la nga an baluto waray luran nga sadang bawion, sugad han nababatasan nira hin pamawi didto hadto nga pamarantayan, iya pinalabay hin waray kaulangan.
An bantay nga sibil dida ha Pasig amo man, waray matahap hin maraot, salit waray ha ira paglabot.
Nagpapamalasibas nga umabot hira ha danaw, han danaw nga malinaw ug mahilom daw in usa nga gidadakui nga panganinawan. An bulan nag-aarupaop ug an Sidlangan inaalop hin mga limbaon nga tina. Ngadto ha antaw hinsisiplatan nira in usa nga lambong nga nagtitiharani.
—An lunday ini nga nagtitidaop, —nagyakan hi Elias;
