This page has been validated.
458
son kay karuyag ko an imo kalipayan. Uunanhon ko in pagtugot nga pumakasal ka hin usa nga pilipino, basi ka magin-usa nga waray palad nga asawa ug maginmasulub’on nga iroy? Diri ko nakukuha ha imo hunahuna an imo hinigugma salit tinigi ko an ngatanan, ginpasipad’an ko an ngatanan, tungod ha imo, tungod la ha imo. Kun magin-asawa ka niya, igtatangis mo unina an kabutangan han imo bana nga pagraraugdaugon ug pagtatalumpiguson hin waray sadang ipakaato; kun magin-iroy ka hiluluhaan ka han kahimtangan han imo mga anak; kun papanag-admon, imo iginandam ha mapait nga kabubwason; magiginkaaway hira han Tuluuhan ngan magkikinita ka nga panmimitayon kun panhahalinon man: kun diri mo tagan hin hibaro, aabaton mo nga pananaghukaan ngan pagpapasiparahan! Diri ko mahitutugot! Salit nagbiniling ako hin usa mo nga magiginbana nga makakahatag ha imo hin pagkairoy, hin mga anak nga mananagsugo, dirt panunuguon, nga magpapahimaan, diri pagpapahimaanon . . . Maaram ako nga an imo sangkay tikang ha kabata maupay, gindara ko hiya sugad hin pagdara hin usa nga amay, kundi inaway ko hiya tikang la sabuton ko nga hiya an makakadarahig ha imo hin kasakitan, tungod kay ginmayuyo ta ikaw, ginpaurog ug hinigugma sugad hin paghigugma hin usa nga anak; waray ko iba nga kaliawan kun diri ikaw; hinkit’an ta ikaw tikang han katawo; diri nahahagos in usa kauras nga diri ako ha imo hanumdom; ikaw la an akon kalipayan . . .
Ngan magtinangis hi P. Damaso sugad hin bata.
—Ada, ta, kun nahigugma kaman ha akon ayaw ako pagbidua ha kadayunan; kay patay na man hiya, masulod ako pagkamongha!
An tigurang tinmungko ha iya kamot.
—Pagkamongha, pagkamongha!— nagsiring. —Diri ka sayod, iday, han mga kaagi ug mga nanhihinabo ha sakob hiton mga kuta, diri ka sayod! Gabay ka pa maginwaray palad dinhi ha tuna ngan diri didto ha sakob hin kombento . . . Dinhi ha gawas hibabatian an imo mga sumbong; didto mahunob la ha mga kuta . . . Ikaw mahusay, mahusay ka kaupay, ngan diri angay ha imo an pagkaasawa ni Kristo! Tuod la ha akon, iday, ngatanan hinngangalimtan ha urhi; mga sano hingangalimtan mo hiya ngan mahagugugma, hihigugmaon mo an ime bana. . . hi Linares.
