459
—Kun diri an kombento . . . an kamatayon!— binalik pagluwas ni Maria Clara.
—An kombento, kun diri an kombento an kamatayon! — nakasiring hi P. Damaso. —Maria, tigurang na ako diri na ako makakagmangno ha imo hin halawig nga panahon, diri ko na masisigapno an imo kahimtangan .. . Pilia in lain nga kabtang, pangita hin lain nga higugma, lain nga batan’on, bisan hino, kundi ayaw la an kombento.
—An kombento, kun diri an kamatayon
—Ginoo ko, Ginoo ko! — namulong an padi, itinabon ha iya bayhon an mga kamot; — imo ako pinasisirutan, aantuson ko! Kundi, luwasa an akon anak...
Ngan atubangon an daraga:
—Karuyag ka magin-mongha? Matutuman; diri ko buot nga mamatay ka.
Kinaptan ni Maria Clara an iya duha nga kamot, idinuon ha iya dughan, hinadkan nga naluhod.
—Amay ko ha bunyag!— nganiya.
Unina hi Fr. Damaso ginmawas, masamdong, natamod ngan nagpapanhayhayon,
—Ginoo nga Dios, matuod ka tungod kay nasirot ka! Kundi hi ako an tagi hin kasalakban ngan ayaw say paululi an waray sala, bawia an akon anak!
Didto ha igbaw hin usa nga bakilid, ha ligid hin sapa, natatago ha butnga hin kakahuyan in usa nga payag nga mga birikis an tuko. Ha bawbaw han atop nga kugon(1) nagkakantay an marampag ngan bungaan ug bukaran nga upo; mga sungay hin bugsok, mga ul-ulan hin baboy nga ihalas, an iba ngani may nanlalabaw nga tango, asya an sebong ha sakob hini nga payag. Naukoy didto in usa nga panimalay nga tag-alog nga parapanganop ug parapangahoy.
Ha lindong hin usa nga kahoy an apoy nagpipinamaros hin gihay nga hirimuon nga silhig hamtang in duduha nga apo nga lalaki nagbabayo hin humay nga ira dinuduyugan hin kanta ngan in usa man nga daraga nagsusulod ha usa nga singlot hin bunay, kidya ngan utanon. Didto ha luyo may duduha nga bata, lalaki an usa ug an usa babayi, nga
