465
adto an makatitingala nga kagurangan han kaaapuyan ni Ibarra.
An bata nakadamo hipakdol ngan hiparambo, kundi nabuhat la liwat, diri naabat bin maul-ol; ngatanan an iya kalag nakada ha iya mga mata nga nagsisinunod han hinigugma nga lambong.
Inagian nira an sapa nga maliaway; an mga tunok han tangnan dida ha ligid nanulot ha iya mga tiil nga waray sapin: kundi diri hi Basilio nag-aasa pagbunlot han tunok.
Ha iya dako nga paghitingala, iya ginkikinita nga hi iya nanay nasurop ngadto ha kasuksukan ngan sinmulod ha purtahan nga kahoy nga asya an nakakasada han lubnganan han tigurang nga katsila ha sirong han nunok.
Hi Basilio nag-isurulod man kundi hin-abutan niya nga tinakpan an purtahan; dinudun’an han tuyaw didto ha sakob han iya magasa nga butkon, nalulugayan han buhok, basi diri mabuksan.
—Nanay, hi ako gad, ako, hi Basilio, imo anak! —ginmuliat an bata nga pinmakatumba na la dara han kakapoy.
Kundi an tuyaw waray tuturos; naninikad hin panuon. Ginpukpok ni Basilio an sada, pinudol han iya ulo nga nagdudurugo, nagtinuok, kundi kawang la ngatanan. Naghinayhinay hin pagtindog, siniplatan an kuta kay iya ginhuhunahunaan hin pagsaka, kundi waray niya hinsiplatan nga sadang sak’an. Iya linibot ngan nakakita hin usa nga sanga han mamino nga nunok nga iginkakabangday hin igkasi sanga hin lain nga kahoy. Iya ginsaka, an iya paghingyap hin nanay nakakapapiskay ha iya, nagpapangangalahit hiya dida han mga sanga tubtob han pagsangpot niya ngadto han kanan nunok ngan didto hinkit’an niya nga hi iya nanay nagdidinuon pa dida han sada han iya ulo.
Tungod han karasikas han mga sanga nakapanginano hi Sisa; binayaan an sada ngan mag-idadalagan, kundi an anak inmambak didto han kahoy ngan gumahos ha iya ngan maghinarok, katapos hini maunop.
Hi Sisa nakapanginano han nagdudurugo nga agtang nga say niya gintinutok, haros nanhuhulwa an tawutawo ha iya mga mata; iya pinanginano an nawong ug an iginduduruas nga dagway nakapukaw han iya pamurubuot; daw sugad hin inalpan hin kasilaw an iya panhunahuna, hinkilal’an niya an iya anak ngan gumuliat, nahaparugmok
