Page:An-Kaduntan-Han-Bungto-ni-Jose-Rizal-1962.pdf/55

45 linalambungan bin haglaba nga kiray, magtawatawa ngan maglipayon kun an bata nagmumulay; kamasamdong, diri matukib ngan mananong kun hiya nahimuot. Han hiya gutiay pa, an iya kurong nga buhok baga dapit mabulaw; an iya irong nga matadong diri man kay tais, diri man liwat pusngok; an iya baba nakakapahinumdom han gutiay ug mahiyumhiyom nga baba ni adton iya nanay nga kalundiison; an iya panit sugad hin kanipis han panit han sibuyas ngan sugad hin kabusag han gapas, siring pa han nagkakabibihag niya nga mga kaurupdan nga dida abat hin sinupuhan kan Kapitan Tiyago han gudti ug mag-upay in lirik nga mga talinga ni Maria Clara. An hinpapasangilan ni Dada Isabel hadto nga dapit katsilan’on nga panagway amo an pangipa ni Da. Pia; nahanunumdom hiya nga han mga siyahan pa nga mga bulan han iya tiyan iya hinkit'an nakadamo nga nagtitinangis ha atubangan ni S. Antonio; usa liwat nga patod ni Kapitan Tiyago amo man gihapon an siring, lugaring kay nagkakalain nga ladawan; kay nasiring nga an Virgen o hi San Mi­ guel. Usa nga sangyaw nga pilosopo nga patod ni Kapitan Tinong nga nakakatanog hin maupay han Amat, (j<) didto pagbibilnga ha mga bituon an hinpapasangilan. Hi Maria Clara, pinaurog han ngatanan, tinmubo ha butnga hin mga pagmayuyo ug mga kalipayan. Bisan an mga prayle naghuhugay ha iya hin damo nga hatag kun di­ da ha mga prusisyon nagpapakakita ha iya nga pinanaptunan hin busag, an kurong ug marabong nga buhok pinahutpahutan hin mga bukad hin marol ug asusenas, ha bungkog may ipinadukot dida ha panapton nga duduha nga pako nga salapi ug bulawan ngan ha kamot may dara nga duduha nga magbusag nga sarapati nga hinigtan hin matagom nga liston. Ngan malipayon gud hiya hin duro, binatan'on an iya pakihimangraw ngan hi Kapitan Tiyago, bihag ha pagpaura, waray iba nga nabubuhat kun diri an pagpasalamat han mga siringbahon ha Obando ngan panagdon han iba nga mamalit hin maghusay nga ladawan. Didto ha mga tuna nga natutunguran han adlaw an babayi nagigindaraga ha mga ikanapulo kagtulo kun napulo ba kag-upat an panuigon, sugad hin usa nga biyuos nga hiton kabubuwas maginbukad. Han dida hiya hini nga mga panuigon, puno hin mga katingalahan ug mga kaaghop sinmulod hiya ha Sta. Catalina tungod han sagdon han padi ha Binondo, basi mag-aram didto han mga monghas han