Dida han kaagi han mga sakit han tawo may uusa nga kaduntan nga kapin kamaraot nga bisan an tuman la nga sinasapingan nakakahatag han lawas hin diri nga gayod mailob nga kamasuol. kamasuol. Ha akon nakadamo nga paghingandoy ha imo, ha butnga han bag-o nga mga kauswagan, ngan pagdaradara ha imo ha akon panumduman, kun pagtanding man ha imo han iba nga mga tuna, nakadamo ko man kitaa an imo maambong nga ladawan nga ha mga ginawian may dara nga masugadsugad nga sakit.
Tungod han paghingyap han imo kaupayan, nga asya an amon, ngan hin pagbiling man han gimaupayi nga tambal, bubuhaton ko ha imo an sugad han binubuhat han una nga mga tawo hadton ira magsakit: iginbubutang ha mga balitangan han singbahan basi an tagsatagsa nga mapakadto pangamuyo han tuluuhan makagsagdon han angay nga bulong.
Dida hini, tatalinguhaon ko an pagpahayag hin tukib han imo kamutangan hin waray likawlikaw; bubukson ko an nakakatabon han sakit; ig-uula ko, tungod han kamatuuran, an ngatanan pati an lugaringon ko nga makaaalo, tungod kay anak mo, nahauupod ako han imo mga karat'an ug mga kasurusnan.
Europa, tuig 1886.
